Хоразм вилоятида Урганч шаҳрида яшовчи аёлнинг пул ва телефонларини товламачилик йўли билан олмоқчи бўлган шахс қўлга олинди, дея хабар бермоқда Тергов департаменти.
Маълум қилинишича, вилоят ИИБ бошлиғи номига фуқаро 32 ёшли Ш.Н. (аёл) ариза билан мурожаат қилиб, унда таниши 31 ёшли Ф.Б. у учун сир сақланиши лозим бўлган видеотасвирларни яқин қариндошларига кўрсатиб шарманда қилиш билан қўрқитиб, 1 500 АҚШ доллар ва Samsung Galaxy S20 русумли телефон беришини талаб қилаётганлигини маълум қилган.
Таъкидланишича, 2021 йилнинг 16 март куни соат 20:00 да Урганч шаҳри А.Т. кўчасида Ф.Б. 1 500 АҚШ доллари ва Samsung Galaxy S20 русумли телефон аппаратини Ш.Н.дан товламачилик йўли билан олаётган вақтида ашёвий далиллар билан ушланган.
Мазкур ҳолат юзасидан Урганч шаҳри бўйича ИИО ФМБ ҳузуридаги Тергов бўлими томонидан Ф.Б.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилиб, гумон қилинувчи тариқасида жалб қилинган.
Ҳозирда тергов ҳаракатлари олиб борилмоқда.
Маълумот учун, бу турдаги жиноятлар учун Жиноят кодексининг нормаларига кўра, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш жазоси тайинланади.
Бундан аввал Тошкентда қизи ва йигит ўртасидаги муносабатларни сир сақлаш учун йигитнинг отасидан пул талаб қилган аёлга жиноят иши қўзғатилгани, Бухорода тадбиркорга қурол ўқталиб, ундан 70 минг доллар талаб қилган спортчилар қўлга олингани ҳамда Фарғонада дугонасининг суратларини турмуш ўртоғига кўрсатмаслик учун 1,5 минг доллар талаб қилган қизлар ушлангани ҳақида хабар берилганди.
Изоҳ (0)