Vadim Abramov: “Gana garchi milliy chempionatda o‘ynayotgan futbolchilarni olib kelgan bo‘lsa ham juda kuchli jamoa”

O‘zbekiston terma jamoasi bosh murabbiyi Vadim Abramov Gana terma jamoasiga qarshi kechadigan o‘rtoqlik o‘yini oldidan o‘z fikrlari bilan o‘rtoqlashdi. Bu haqda “Championat.asia” xabar qilmoqda.

 Gana terma jamoasi asosiy tarkibi bilan kelmagani haqida

Albatta, kuchliroq jamoa bilan o‘ynashni xohlaymiz. Karantin tufayli hozir barchaga juda qiyin. Yevropada JCh—2022 saralash bahslari start oldi va u yerdan raqib topib bo‘lmasdi. Gana — kuchli jamoa, uning qaysi jamoasi bo‘lsa ham kuchli deb o‘ylayman. Biz ham oldingi yig‘inlarda legionerlarsiz ishtirok etdik va terma jamoamizni B yoki V deb atamadik. Shu bois Gana milliy chempionatida o‘ynayotgan futbolchilardan iborat terma jamoaga qarshi o‘yin ancha qiyin bo‘ladi. Sababi ular top-klublarga o‘tishni xohlaydi. Tojikiston yoki Qirg‘iziston bilan o‘ynasak, nima uchun kuchliroq jamoa bilan o‘ynamaymiz deyishadi. Gana kelsa, undan ko‘ra Tojikiston bilan o‘ynaganimiz yaxshi edi deyishadi. O‘FAga Gana bilan o‘yinni tashkil qilib bergani uchun rahmat aytaman.

Terma jamoa murabbiylar shtabidagi o‘zgarishlar borasida

Bunga asosiy sabab: terma jamoa murabbiylari klubda ishlashi mumkin emas deyildi. Kapadze terma jamoa shtabini tark etdi. Jismoniy tayyorgarlik bo‘yicha Antonio Sariogluni taklif qildik. Anvar G‘ofurov yaqinda futbolchilik faoliyatini tugatdi va uni terma jamoaga taklif qildim. Undan yaxshi murabbiy yetishib chiqadi deb o‘ylayman.

JCh—2022 saralash bahslari Saudiya Arabistonida o‘tishi haqida

O‘yinlar Saudiya Arabistonida o‘tishi haqida nima deyishim mumkin? Yozda u yerda ob havo qanday bo‘lishini men bilaman. Shunchaki tribunada o‘tirsangiz terlab ketasiz, maydonga tushib, 90 daqiqa o‘ynashni aytmay qo‘yaqolay. Yozda Saudiya Arabistoni milliy chempionat o‘yinlarini ham o‘tkazmaydi. Biroq OFK baribir Saudiya Arabistonini tanladi. Agar bittagina o‘yin bo‘lsa tushunardim, ammo qisqa vaqt ichida uchta o‘yin o‘tkazishimiz kerak. Janubiy Amerikadagi qaysidir davlat Boliviyadagi tog‘da futbol o‘ynaganda, barcha shovqin ko‘targandi. Ammo Osiyoda hech kim issiqda futbol o‘ynashga qarshi emas.

O‘yin amaliyotisiz qolayotgan Odil Ahmedovning o‘rinbosari haqida

Ha, bu ham muammolarimizdan biri. Chunki Odil Ahmedov anchadan buyon rasmiy o‘yinlarda ishtirok etmayapti. Eshitishimga qaraganda Ahmedov yangi klub bilan shartnoma tuzdi va umid qilamanki, yozgacha o‘yin amaliyotiga ega bo‘ladi. Agar yozgacha baribir u yetarli formada bo‘lmasa tarkibda Odilning o‘rnini bosa oladigan futbolchilar bor. Ikrom Aliboyev operatsiya stoliga yotdi va “Seul”dan ketdi. U Koreya birinchi ligasi klubiga ko‘chib o‘tmoqda. Yozgacha u ham ko‘proq o‘ynasa yaxshi bo‘lardi. Jamshid Iskandarov ham o‘yin amaliyotiga ega bo‘lmayapti. Aziz G‘aniyev afsuski, jarohat tufayli yarim yilga safdan chiqdi. Muammolarni ijobiy hal qilishga urinamiz.

Husniddin Aliqulovning terma jamoaga chaqirilmagani haqida

O‘tgan yig‘inda uni terma jamoaga chaqirgandik. “Shaxtyor Soligorsk” klubiga qarshi bahsda debyut qilgandi, tan olish kerak, debyut u qadar muvaffaqiyatli chiqmadi. Ayni paytda O‘zbekiston U-23 terma jamoasi Turkiyada xalqaro musobaqada qatnashmoqda va Aliqulov o‘sha jamoada o‘yin amaliyotiga ega bo‘lishini to‘g‘ri deb topdik. Uning harakatlariga baho beramiz. Milliy terma jamoaga yangi ikki markaziy himoyachini jalb qildik. Husniddinni chaqirib, zaxirada o‘tirishini noto‘g‘ri deb hisobladik.

O‘zbekiston terma jamoasining FIFA kunlaridan boshqa paytlarda yig‘in o‘tkazishi haqida

Menga bundan oldin qachon FIFA kunlari bo‘lmagan paytda yig‘ilganimizni ayta olasizmi? Faqat pandemiya vaqtida chempionat to‘xtatilgan paytda yig‘ilgandik. Agar reglamentni o‘qib ko‘rsangiz u yerda milliy chempionat milliy terma jamoa manfaati yo‘lida tashkil etiladi deb yozilgan. Barchasi terma jamoa muvaffaqiyatli to‘p tepishi uchun qilinmoqda. Agar FIFA kunlaridan tashqari yig‘inlar qilmasa, PFL bu bilan kuchayib qoladimi? Reglamentni ochib birinchi sahifani o‘qib ko‘ring.

Abramov Superliganing markaziy o‘yinlari qolib, “Bunyodkor” ishtirokidagi uchrashuvlarga tushayotgani haqida

Bilasizmi, Samarqandda Superkubok o‘yini bo‘ldi u yerda “Nasaf” — “Paxtakor” uchrashuvini tomosha qildim. Ikki kundan keyin yana shu jamoalar o‘ynadi, yana qanday yangilikni ko‘rishim mumkin? “Bunyodkor”da yo‘qman, agar bu terma jamoaga xalal berayotgan bo‘lsa uyimda ham yashamasligim mumkin.

Jasur Jaloliddinovning mojaroli transferi haqida

Futbolchilar maslahat so‘rasa, albatta, maslahat beraman. Ammo ular ko‘pincha quloq solmaydi. Mana Jaloliddinov: u “Lokomotiv M”ga ketganida kam pulga sotildi deb jar solishdi. Moskva klubida o‘yin amaliyotiga ega bo‘lmasa “Bunyodkor”ga qaytib, maoshni “Lokomotiv”dan olishi va “Bunyodkor”da o‘ynashi kerak edi. Ammo o‘sha paytda turli mish-mishlar chiqa boshladi va futbolchi transfer oynasi yopilguniga qadar qayta olmadi. “Tambov”ga bordi va o‘ynay olmadi. Sababi Rossiyada jismoniy futbol namoyish etiladi. Undan keyin Ispaniyadan taklif bo‘lgandi, ammo Jasurning o‘zi “Andijon”ni tanladi. Men unga “Andijon”ga o‘tishini maslahat bergan deb o‘ylaysizmi? Yo‘q, unga Ispaniyaga borishini maslahat bergandim. Endi u Turkiyaga bormoqchi, menimcha, Turkiyaga borib birinchi ligasida o‘ynaydi. Bu chempionatda ham oson bo‘lmaydi. Bizda pul topish oson. Hozir hatto jurnalistlar ham agentlik bilan shug‘ullanmoqda.

Yegor Krimets terma jamoa yig‘inlaridan oldin tarkibda tushib qolishi haqida

Balki, Yegor intervyuda aytgan gapimdan xafadir, ammo u bilan gaplashib olganman. Yegor terma jamoada o‘ynashni istamayman demagan. Shunchaki jarohat olmoqda va biz jarohat olganlarni chaqira olmaymiz-ku.

Haqiqatdan ham markaziy himoyada muammo bor. U doim bo‘lgan. Hozir Azim Ahmedovni chaqirdik. “Navbahor”dagi o‘yinda tomosha qildim. “Nasaf” va “Lokomotiv” bilan o‘yinlarda kuzatdim. Milliy terma jamoa darajasida uni sinab ko‘rishni xohladim. Agar Azim bundan foydalana olsa terma jamoa uchun ham foyda bo‘ladi.

Vadim Abramov, O‘zbekiston terma jamoasi bosh murabbiyi