Вадим Абрамов: «Гана гарчи миллий чемпионатда ўйнаётган футболчиларни олиб келган бўлса ҳам жуда кучли жамоа»

Ўзбекистон терма жамоаси бош мураббийи Вадим Абрамов Гана терма жамоасига қарши кечадиган ўртоқлик ўйини олдидан ўз фикрлари билан ўртоқлашди. Бу ҳақда «Championat.asia» хабар қилмоқда.

 Гана терма жамоаси асосий таркиби билан келмагани ҳақида

Албатта, кучлироқ жамоа билан ўйнашни хоҳлаймиз. Карантин туфайли ҳозир барчага жуда қийин. Европада ЖЧ—2022 саралаш баҳслари старт олди ва у ердан рақиб топиб бўлмасди. Гана — кучли жамоа, унинг қайси жамоаси бўлса ҳам кучли деб ўйлайман. Биз ҳам олдинги йиғинларда легионерларсиз иштирок этдик ва терма жамоамизни Б ёки V деб атамадик. Шу боис Гана миллий чемпионатида ўйнаётган футболчилардан иборат терма жамоага қарши ўйин анча қийин бўлади. Сабаби улар топ-клубларга ўтишни хоҳлайди. Тожикистон ёки Қирғизистон билан ўйнасак, нима учун кучлироқ жамоа билан ўйнамаймиз дейишади. Гана келса, ундан кўра Тожикистон билан ўйнаганимиз яхши эди дейишади. ЎФАга Гана билан ўйинни ташкил қилиб бергани учун раҳмат айтаман.

Терма жамоа мураббийлар штабидаги ўзгаришлар борасида

Бунга асосий сабаб: терма жамоа мураббийлари клубда ишлаши мумкин эмас дейилди. Кападзе терма жамоа штабини тарк этди. Жисмоний тайёргарлик бўйича Антонио Сариоглуни таклиф қилдик. Анвар Ғофуров яқинда футболчилик фаолиятини тугатди ва уни терма жамоага таклиф қилдим. Ундан яхши мураббий етишиб чиқади деб ўйлайман.

ЖЧ—2022 саралаш баҳслари Саудия Арабистонида ўтиши ҳақида

Ўйинлар Саудия Арабистонида ўтиши ҳақида нима дейишим мумкин? Ёзда у ерда об ҳаво қандай бўлишини мен биламан. Шунчаки трибунада ўтирсангиз терлаб кетасиз, майдонга тушиб, 90 дақиқа ўйнашни айтмай қўяқолай. Ёзда Саудия Арабистони миллий чемпионат ўйинларини ҳам ўтказмайди. Бироқ ОФК барибир Саудия Арабистонини танлади. Агар биттагина ўйин бўлса тушунардим, аммо қисқа вақт ичида учта ўйин ўтказишимиз керак. Жанубий Америкадаги қайсидир давлат Боливиядаги тоғда футбол ўйнаганда, барча шовқин кўтарганди. Аммо Осиёда ҳеч ким иссиқда футбол ўйнашга қарши эмас.

Ўйин амалиётисиз қолаётган Одил Аҳмедовнинг ўринбосари ҳақида

Ҳа, бу ҳам муаммоларимиздан бири. Чунки Одил Аҳмедов анчадан буён расмий ўйинларда иштирок этмаяпти. Эшитишимга қараганда Аҳмедов янги клуб билан шартнома тузди ва умид қиламанки, ёзгача ўйин амалиётига эга бўлади. Агар ёзгача барибир у етарли формада бўлмаса таркибда Одилнинг ўрнини боса оладиган футболчилар бор. Икром Алибоев операция столига ётди ва «Сеул»дан кетди. У Корея биринчи лигаси клубига кўчиб ўтмоқда. Ёзгача у ҳам кўпроқ ўйнаса яхши бўларди. Жамшид Искандаров ҳам ўйин амалиётига эга бўлмаяпти. Азиз Ғаниев афсуски, жароҳат туфайли ярим йилга сафдан чиқди. Муаммоларни ижобий ҳал қилишга уринамиз.

Ҳусниддин Алиқуловнинг терма жамоага чақирилмагани ҳақида

Ўтган йиғинда уни терма жамоага чақиргандик. «Шахтёр Солигорск» клубига қарши баҳсда дебют қилганди, тан олиш керак, дебют у қадар муваффақиятли чиқмади. Айни пайтда Ўзбекистон U-23 терма жамоаси Туркияда халқаро мусобақада қатнашмоқда ва Алиқулов ўша жамоада ўйин амалиётига эга бўлишини тўғри деб топдик. Унинг ҳаракатларига баҳо берамиз. Миллий терма жамоага янги икки марказий ҳимоячини жалб қилдик. Ҳусниддинни чақириб, захирада ўтиришини нотўғри деб ҳисобладик.

Ўзбекистон терма жамоасининг ФИФА кунларидан бошқа пайтларда йиғин ўтказиши ҳақида

Менга бундан олдин қачон ФИФА кунлари бўлмаган пайтда йиғилганимизни айта оласизми? Фақат пандемия вақтида чемпионат тўхтатилган пайтда йиғилгандик. Агар регламентни ўқиб кўрсангиз у ерда миллий чемпионат миллий терма жамоа манфаати йўлида ташкил этилади деб ёзилган. Барчаси терма жамоа муваффақиятли тўп тепиши учун қилинмоқда. Агар ФИФА кунларидан ташқари йиғинлар қилмаса, ПФЛ бу билан кучайиб қоладими? Регламентни очиб биринчи саҳифани ўқиб кўринг.

Абрамов Суперлиганинг марказий ўйинлари қолиб, «Бунёдкор» иштирокидаги учрашувларга тушаётгани ҳақида

Биласизми, Самарқандда Суперкубок ўйини бўлди у ерда «Насаф» — «Пахтакор» учрашувини томоша қилдим. Икки кундан кейин яна шу жамоалар ўйнади, яна қандай янгиликни кўришим мумкин? «Бунёдкор»да йўқман, агар бу терма жамоага халал бераётган бўлса уйимда ҳам яшамаслигим мумкин.

Жасур Жалолиддиновнинг можароли трансфери ҳақида

Футболчилар маслаҳат сўраса, албатта, маслаҳат бераман. Аммо улар кўпинча қулоқ солмайди. Мана Жалолиддинов: у «Локомотив М»га кетганида кам пулга сотилди деб жар солишди. Москва клубида ўйин амалиётига эга бўлмаса «Бунёдкор»га қайтиб, маошни «Локомотив»дан олиши ва «Бунёдкор»да ўйнаши керак эди. Аммо ўша пайтда турли миш-мишлар чиқа бошлади ва футболчи трансфер ойнаси ёпилгунига қадар қайта олмади. «Тамбов»га борди ва ўйнай олмади. Сабаби Россияда жисмоний футбол намойиш этилади. Ундан кейин Испаниядан таклиф бўлганди, аммо Жасурнинг ўзи «Андижон»ни танлади. Мен унга «Андижон»га ўтишини маслаҳат берган деб ўйлайсизми? Йўқ, унга Испанияга боришини маслаҳат бергандим. Энди у Туркияга бормоқчи, менимча, Туркияга бориб биринчи лигасида ўйнайди. Бу чемпионатда ҳам осон бўлмайди. Бизда пул топиш осон. Ҳозир ҳатто журналистлар ҳам агентлик билан шуғулланмоқда.

Егор Кримец терма жамоа йиғинларидан олдин таркибда тушиб қолиши ҳақида

Балки, Егор интервьюда айтган гапимдан хафадир, аммо у билан гаплашиб олганман. Егор терма жамоада ўйнашни истамайман демаган. Шунчаки жароҳат олмоқда ва биз жароҳат олганларни чақира олмаймиз-ку.

Ҳақиқатдан ҳам марказий ҳимояда муаммо бор. У доим бўлган. Ҳозир Азим Аҳмедовни чақирдик. «Навбаҳор»даги ўйинда томоша қилдим. «Насаф» ва «Локомотив» билан ўйинларда кузатдим. Миллий терма жамоа даражасида уни синаб кўришни хоҳладим. Агар Азим бундан фойдалана олса терма жамоа учун ҳам фойда бўлади.

Вадим Абрамов, Ўзбекистон терма жамоаси бош мураббийи