Ўзбекистон—Туркия ҳамкорлигида ўтказилган Термиздаги махсус-тактик ўқувлар якунланди, дея хабар қилмоқда Мудофаа вазирлиги.
Қайд этилишича, 25 март куни Термиз дала-ўқув майдонида машғулотнинг асосий босқичи ўтказилиб, унда икки давлат ҳарбийлари биргаликда шартли қуролланган тўдаларни турли шароитларда зарарсизлантириш бўйича амалий ҳаракатларни олиб борди.
Тактик-ўқув машғулотларини Туркия Қуролли Кучлари бош штаби бошлиғи, армия генерали Яшар Гулер ҳамда Ўзбекистон Мудофаа вазирининг биринчи ўринбосари – Қуролли Кучлар бош штаби бошлиғи, генерал майор Шуҳрат Холмуҳамедов бевосита кузатиб борди.
Мавзуга доир: Ўзбекистон мудофаа вазирига биринчи ўринбосар тайинланди
Машғулот режасига кўра, давлат чегарасини бузиб ўтишга уринган бир гуруҳ ноқонуний қуролланган шартли душман ҳақида разведка маълумотлари олинди. Учувчисиз учиш аппарати ёрдамида шартли душманинг сони ва жанговар имкониятлари, улар қўлга олган ҳудуд ўрганилди.
Тўпланган маълумотларга асосан икки давлат бўлинмалари авиация, енгил зирҳланган жанговар техникалар ва ўт очиш воситалари ёрдамида душман тўдаларига зарба бериб, уларнинг куч тузилмаларини йўқ қилди.
Махсус-тактик ўқувда нафақат икки давлат армияси, шунингдек, Ўзбекистон Қуролли Кучлар тузилмалари ўртасида ҳамкорликда ҳаракатланиш кўникмаларини оширишга ҳам эътибор қаратилди.
Таъкидланишича, ҳамкорликдаги ўқув машғулоти ўзбек ва турк ҳарбийлари учун ўзаро тажриба алмашиш, билим ва кўникмаларини мустаҳкамлаш, энг муҳими, ўзаро ҳамжиҳатлик ва дўстлик алоқаларини мустаҳкамлашга хизмат қилди.
Махсус-тактик ўқувлар якунида машғулотларда фаол қатнашган ҳар икки мамлакат ҳарбий хизматчилари муносиб тақдирланди.
Бундан аввал Ўзбекистон ва Туркия ўртасида ҳарбий-молиявий ҳамкорлик битими тасдиқлангани ҳамда Ўзбекистон ва Ҳиндистон ҳарбийлари «Дўстлик-II» ўқув машғулотларини ўтказгани ҳақида хабар берилганди.
Изоҳ (0)