Фарғона ва Наманган шаҳарларининг 4 та сектор раҳбари 2021 йилнинг ўтган даврида ишдан олинган. Бу ҳақда Президент Шавкат Мирзиёев раислигида «Обод қишлоқ» ва «Обод маҳалла» дастурларини 2021 йилда амалга ошириш масалалари муҳокамасига бағишлаб ўтказилган видеоселектор йиғилишида маълум қилинди, дея хабар бермоқда «Дарё» мухбири.
«Бир нарсани барча ҳудуд ва сектор раҳбарлари аниқ тушуниб олиши зарур. ‘Обод қишлоқ’ ва ‘Обод маҳалла’ деганда, нафақат уларнинг йўллари ёки маҳалланинг қиёфаси яхшиланиши, балки у ердаги аҳолининг даромади кўпайиши, ижтимоий соҳа объектлари тўлиқ ишлаши, бир сўз билан айтганда, танланган маҳалла ҳар томонлама обод бўлиши керак.
Энг асосийси, ҳақиқий обод маҳаллада ‘темир дафтар’, ‘аёллар’ ва ‘ёшлар’ дафтарлари бўлмаслиги лозим. Бунинг учун лойиҳаларни ишлаб чиқишда қишлоқ ва маҳалла аҳолиси ҳамда тадбиркорлар билан маслаҳатлашувлар ўтказиш орқали улар иштирокини таъминлаш, бунда ободончилик билан бир қаторда, янги иш ўринлари яратиш, ишлаб чиқариш объектларини барпо этишни ҳам инобатга олиш зарур», — деди давлат раҳбари.
Президентнинг таъкидлашича, «Обод қишлоқ» ва «Обод маҳалла» дастурлари «бир марталик иш»га айланиб қолмаслиги, қилинган ҳар бир сўм инвестиция, одамларга уч баравар кўп фойда келтириши, уларнинг даромадини ошириши лозим.
«Афсуски, ҳамма раҳбарлар ҳам бу масалаларни тушуниб етмаяпти. Мисол учун, Фарғона, Наманган ва Тошкент вилоятлари маҳаллаларидаги ҳақиқий ҳолат бунинг акси эканини кўрсатди. Шу сабабли, Фарғона ва Наманган шаҳарларининг 4 та сектор раҳбари ишдан олинди. Тошкент вилояти ва Чирчиқ шаҳри сектор раҳбарларига вазиятни яхшилаш бўйича муддат берилди. Ўзгариш бўлмаса, уларга ҳам чора кўрилади», — деди Шавкат Мирзиёев.
Бундан аввал Шавкат Мирзиёев Хоразм вилоятида амалга ошириладиган инвестиция лойиҳалари тақдимоти билан танишгани, Шавкат Мирзиёев халқаро консультантларни қабул қилгани ҳамда Facebook’да Шавкат Мирзиёев номидан саҳифа очиб, пул эвазига ёрдам беришни таклиф қилган шахс ушлангани ҳақида хабар берилганди.
Изоҳ (0)