Ҳиндистонда коронавируснинг икки марта мутацияга учраган янги штамми аниқланди. Бу ҳақда Ҳиндистон Соғлиқни сақлаш вазирлигига таяниб «Интерфакс» хабар берди.
«Махараштра (Ҳиндистоннинг ғарбий ҳудуди)даги намуналарни таҳлил қилиш мобайнида, мазкур намуналардаги E484Q ва L452R мутацияларининг улуши 2020 йил декабрь ҳолатига нисбатан ортгани кузатилди. Ушбу мутациялар намуналарнинг, тахминан, 15—20 фоизида аниқланган ва илгари аниқланган хавотирли штаммларнинг ҳеч бирига мос келмайди», — дейилади Ҳиндистон Соғлиқни сақлаш вазирлиги Twitter’ида.
10 мингдан ортиқ намуналар таҳлил қилинар экан, вазирлик «британча» штаммга чалиниш бўйича 736 та, «африкача» штамм бўйича 34 та, «бразилияча» штаммни юқтириш бўйича битта ҳолатни аниқлаган. Ушбу штаммларнинг намуналари Ҳиндистоннинг 18 штатида топилган.
The Indian Express нашрининг ёзишича, Ҳиндистоннинг кўплаб ҳудудларида COVID-19 юқтириш ҳолатлари ортган. Шу сабабли, ҳукумат 1 апрелдан 45 ёшдан катта бўлган барча аҳолини эмлашга рухсат беришга қарор қилди. Деҳли ва Мумбайда эса ҳафта охирида бошланадиган Холи байрамини нишонлаш тақиқланади.
2021 йилнинг 24 март куни Ҳиндистон ҳукуматининг коронавирус пандемияси туфайли локдаун эълон қилганига бир йил тўлди. Жонс Ҳопкинс университети маълумотларига кўра, пандемия бошидан бери мамлакатда 11, 7 миллион кишида коронавирус аниқланган, 160 минг киши инфекция оқибатида вафот этган.
Аввалроқ Финляндияда коронавируснинг янги мутацияси аниқланди. Жанубий Финляндияда аниқланган коронавирус намунасида SARS-CoV-2 вирусининг илгари номаълум вариантига дуч келинган.
Шунингдек, Норвегияда коронавируснинг В.1.525 номли штамми аниқланди. Бу одатий COVID-19’дан анча хавфлироқ бўлиши мумкин.
Бундан ташқари, Британияда коронавируснинг «хавотирлироқ» тури ва Калифорнияда коронавируснинг бутунлай янги штамми қайд этилди.
Изоҳ (0)