Ўзбекистонда 2017 йилнинг сентябрь ойида амалга оширилган валюта либерализацияси натижасида долларнинг расмий курси бир кеча-кундузда бир бараварга ошиб кетганди. Ушбу ислоҳот арафасида мамлакат банкларидан билиб-билмай валютада кредит олган тадбиркорлар учун шунчалик кутилмаган воқеа бўлган. «Расмий курс»да банклардан валютада кредит олганлар учун ушбу «катта ўзгариш» режалаштирилмаган бош оғриғини келтириб чиқарган.
Февраль ойида валютада кредит олган бир гуруҳ тадбиркорлар мурожаати асосида ўтган тўрт йил давомида уларнинг муаммосини ҳал қилиш бўйича масъуллар томонидан тайинли таклиф берилмагани, либерализацияга қадар валютада олинган кредитни каррасига ошиб кетган курс билан қайтариш талаби уларни хонавайрон қилаётгани юзасидан «Дарё»да мақола эълон қилинган эди. Унда 30 нафарга яқин тадбиркорлар бир неча маротаба Вазирлар Маҳкамасига мурожаат қилгани, лекин тайинли жавоб ололмаётганлиги баён этилган.
Ҳолат юзасидан Вазирлар Маҳкамаси мутахассиси Шарофиддин Холтемиров «Дарё» нашрига изоҳ берди. Ҳукумат вакилининг маълум қилишича, тадбиркорлар мурожаати Иқтисодий тараққиёт ва камбағалликни қисқартириш вазирлигида ишчи гуруҳ аъзолари томонидан муҳокама қилинган.
«Унга кўра, ишчи гуруҳ аъзолари ҳар бир тадбиркорлик субъектини жойига чиқиб ўрганиб келадиган бўлди. Масалан, совутгичларда қанча маҳсулот сақлаяпти, нима фаолият билан шуғулланаётганини ўрганиб, хулосалар киритди. Бу бўйича бош вазирнинг чора-тадбирлар режаси тасдиқланди. Бунда олтита йўналиш бўйича вазифа қўйилди:
1. Қайси тадбиркорлар Тадбиркорлик фаолиятини ривожлантиришни қўллаб-қувватлаш давлат жамғармасидан компенсация олмаётган бўлса, уларга тўлаб бериш;
2. Кредит муддатларини узайтириб бериш;
3. Туман ҳокимликларидаги захирада турган ерлардан ажратиб бериш, бунда тадбиркорлар маҳсулот етиштириб, ўз совутгичларида сақлашга кўмаклашиш;
4. Ўзида сақланаётган экинлар учун бозорларда расталар ташкил қилиб бериш;
5. Эскпортга йўналтиришга, яъни экспортёр корхоналарни топиб, уларга кўмаклашиш;
6. Гаров таъминоти сифатида қўйилган мол-мулкларини хатловдан ўтказиш ва бугунги кундаги бозор қийматида қайта баҳолаш орқали гаров шартномаларини қайта расмийлаштириш чораларини кўриш бўйича тегишли вазирлик, банк ва ҳудудий ҳокимликларга 17 февраль куни бош вазир Абдулла Арипов томонидан имзоланган топшириқ хати юборилган. Бу топшириқ бўйича барча мурожаатчи тадбиркорларга тушунтириш берганмиз», — деди Шарофиддин Холтемиров.
Шундан сўнг республиканинг турли ҳудудларидан 30 нафар тадбиркор кўрилаётган чоралар ҳеч қандай ёрдам бермаслиги, қайтанга, ундан ҳам каттароқ йўқотишларга олиб келишини билдириб, бош вазир қабулига кириш учун Вазирлар Маҳкамаси биноси ёнига бир неча маротаба йиғилган. Масъуллар 18 март куни тадбиркорларни қабул қилиб, уларнинг бош вазир билан мулоқотларини ташкил этиш юзасидан маълумот берди.«Ишчи гуруҳ тўхтаб қолгани йўқ, бу бўйича яна ишлаяпмиз. Ўзимизнинг ҳам таклифларимизни тайёрладик. Март ойининг 25 ёки 26-санасида бош вазир қабулини режалаштириб турибмиз. Мен раҳбарият учун кун белгилай олмайман. Раҳбарият билан келишган ҳолда кунни белгилаб, тадбиркорларга айтамиз. Бош вазир уларни қабул қилади», — деди Вазирлар Маҳкамаси мутахассиси.
Изоҳ (0)