Navoiyda profilaktika inspektori yo‘lda to‘lg‘oq tutgan homilador ayolga ko‘maklashdi. Bola yo‘lda tug‘ildi. O‘z vaqtida tug‘ruqxonaga olib borilishi natijasida ona va bola hayoti saqlab qolindi. Bu haqda “Daryo”ga viloyat IIB axborot xizmati rahbari O‘ktam Usmonov xabar berdi.
Ma’lum qilinishicha, 21-mart kuni Xatirchi tumanida o‘z xizmat vazifasini olib borayotgan profilaktika inspektori, leytenant Begali Mirzayev soat 23:00 larda ko‘chada avtomashina to‘xtab turganini ko‘rgan. Avtomashina salonida sarosimada turgan ikki ayol borligi va ulardan biri homilador bo‘lib, ayni vaqtda uning to‘lg‘oq holatidaligini ko‘rgan.
Inspektor zudlik bilan bo‘lajak onaga birinchi yordam ko‘rsatishga kirishgan. Qaynanaga tegishli bo‘lgan ushbu avtomashina yo‘lda buzilib qolgani va haydash imkoniyati yo‘qligini bilgan inspektor zudlik bilan yaqin orada joylashgan qishloq vrachlik punktiga borgan. Tibbiyot xodimini keltirgan va shu vaqt oralig‘ida o‘z qo‘l telefonidan Xatirchi tuman tez tibbiy yordam bo‘limiga qo‘ng‘iroq qilib, holatni tushuntirgan. Bu paytda esa to‘lg‘oqdagi ayol farzandini dunyoga keltirgan.
Profilaktika inspektori esa vaqtni boy bermay, ayol va uning chaqalog‘ini o‘z avtomashinasida Xatirchi tuman tug‘ruq bo‘limiga o‘z vaqtida yetib borishini ta’minlagan.
“Profilaktika inspektori bu hushyorligi va ko‘magi bilan ona va farzandning tirik qolishiga sababchi bo‘lgan. Xatirchi tumani tug‘ruqxona bo‘limi navbatchi vrachi Salohiddin Ostonayev hamda yordamchi hamshira Shahlo Qanotovning so‘zlariga ko‘ra, haqiqatan ham ona va bolaga profilaktika inspektori o‘z vaqtida yordam ko‘rsatmaganida ularning hayotini saqlash mushkul bo‘lishini ta’kidladi. Hozirda ularning salomatligi yaxshi ekanini tibbiyot mutaxassislari tasdiqladi”, — dedi O‘ktam Usmonov.
Izoh (0)