O‘zbekistonda 2017-yildan boshlab qurilgan va qurilayotgan barcha binolar 2021-yil oxirigacha qayta nazoratdan o‘tkaziladi

Adliya vazirligi “Qurilish jarayoni ishtirokchilarining mas’uliyati va javobgarligini oshirish, qurilish sohasida nazoratni kuchaytirish va sifatini tubdan yaxshilash chora-tadbirlari to‘g‘risida”gi Prezident farmoni loyihasini muhokamaga qo‘ydi.

Hujjat loyihasi bilan Qurilish vazirligi, Inspeksiya, Qurilishda standartlashtirish respublika markazi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga 2017—2020-yillar davomida qurilgan va foydalanishga qabul qilingan hamda foydalanishga qabul qilish jarayonida bo‘lgan barcha binolarni 2021-yil davomida to‘liq qayta nazoratdan o‘tkazish vazifasi yuklatiladi:

• qurilish sohasida aniqlangan qonun buzilishi holatlari bo‘yicha aybdor mansabdor shaxslarga chora ko‘rish uchun prokuratura organlariga kiritadi;
• qurilish sohasida aniqlangan va bartaraf etilishi mumkin bo‘lgan barcha xato-kamchiliklarni bartaraf etish bo‘yicha buyurtmachilarga ko‘rsatmalar kiritilishini va bajarilishini ta’minlanadi;
• amalga oshirilgan ishlar to‘g‘risida 2021-yil yakuniga qadar Vazirlar Mahkamasiga axborot kiritiladi.

Shuningdek, Madaniyat vazirligi Qurilish vazirligi, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki oy muddatda YuNESKO’ning umumjahon merosi ro‘yxatiga kiritilgan shaharlarning tarixiy hamda muhofaza (bufer) hududlarida joylashgan obyektlarning aniq ro‘yxatini shakllantirishi lozim.

Bundan tashqari, 2021-yil 1-dekabrga qadar ushbu hududlardagi obyektlarni, shu jumladan, ularning atrofini qayta ixtisoslashtirish va rekonstruksiya qilish tartibini aniq belgilash bo‘yicha normativ-huquqiy hujjat loyihasini ishlab chiqib, Vazirlar Mahkamasiga kiritishi belgilangan.

Avvalroq Qurilish vazirligi pudrat tashkilotlarining yangi reyting tizimi haqida ma’lumot bergandi. Shuningdek, qurilishda korrupsiya va qog‘ozbozlikni tugatishi kutilayotgan “Shaffof qurilish” tizimi haqida ma’lumot taqdim etilgandi.

Eslatib o‘tamiz, Shavkat Mirziyoyev raisligida 3-mart kuni uy-joy qurilishi va ipoteka bozorini rivojlantirish chora-tadbirlari bo‘yicha videoselektor yig‘ilishi o‘tkazilgandi. Unda davlat rahbari “2021-yilda 54 ming oilani uy-joy bilan ta’minlashimiz zarur”, deb ta’kidlagandi.