O‘zbekiston Qurilish vazirligi Navoiy viloyatida ko‘p qavatli turar joy binolari va boshqa obyektlarning qurilishida yo‘l qo‘yilgan qonunbuzarliklarni aniqladi, deb xabar beradi vazirlik matbuot xizmati.
Idora qonunbuzarlik bilan qurilish ishlarini olib borayotgan oltita kompaniyani sanab o‘tgan. Ular orasida Zarafshan Golden Group ham bo‘lib, kompaniya Zarafshon shahridagi 13-kichik tumanda shaharsozlikka ruxsat beruvchi hujjatlar rasmiylashtirilmagan hamda hududiy inspeksiyani xabardor etmasdan ko‘p qavatli turar joy obyektida qurilish-montaj ishlarini boshlagan.
Ushbu holat yuzasidan hududiy nazorat inspeksiyasi tomonidan O‘zbekiston Prezidenti huzuridagi tadbirkorlik subyektlarining huquqlarini va qonuniy manfaatlarini himoya qilish bo‘yicha vakilni xabardor etilgan holda qisqa muddatli inspektorlik tekshiruvi o‘tkazilgan. Tekshiruv natijasiga ko‘ra mas’ul fuqaroga nisbatan Ma’muriy javobgarlik to‘g‘risidagi kodeksning 99-moddasi (shaharsozlik to‘g‘risidagi qonun hujjatlarini buzish) 7-qismi bilan o‘rnatilgan tartibda hujjatlar yig‘ilib, Zarafshon shahar Jinoyat ishlari bo‘yicha sudiga yuborilgan.
Avvalroq Zarafshon Buldings kompaniyasi boshqa kompaniyalar bilan bir qatorda Toshkent shaharida noqonuniy qurilish ishlarini amalga oshirgani to‘g‘risida xabar berilgandi. “Gazeta.uz”ning yozishicha, kompaniyaning ta’sischilaridan biri Zarafshan Golden Group hisoblanadi.
Korxonalar va tashkilotlarning yagona davlat registriga ko‘ra, Zarafshan Golden Group (turar joy binolarini qurishga ixtisoslashgan) ta’sischilari Navoiy viloyatidan saylangan senator Ulug‘bek Fayziyev G‘aniyevich (91,5 foiz) hamda Oybek Fayziyev G‘aniyevich (8,4 foiz) hisoblanadi.
Ta’kidlanishicha, Vazirlar Mahkamasining 2020-yil 23-iyuldagi qarori bilan Zarafshan Golden Group Zarafshondagi 650 o‘ringa mo‘ljallangan karantin zonasini qurishning to‘g‘ridan to‘g‘ri bosh pudratchisi etib tayinlangan, buyurtmachi — Navoiy viloyati hokimligi “Yagona buyurtmachi xizmati” injiniring kompaniyasi. Obyekt qurilishi 9,3 milliard so‘mga baholangan (QQS bilan birga). Loyiha davlat budjeti tomonidan moliyalashtirilgan.
Bundan tashqari, Qurilish vazirligi ma’lumotlariga ko‘ra, Navoiy viloyatida “Sifat qurilish Zarafshon”, “Zarafshon Binoinshoot qurilish”, “Hakimzoda”, “Osiyo Yugra” va “Laylo ulgurji savdo” kompaniyalari ham qonunbuzarlikka yo‘l qo‘ygan holda qurilish ishlarini olib borgan.
Zarafshan Golden Group Zarafshon hokimining 2020-yil 28-iyuldagi qarori bilan kompaniya Navoiydagi 13-kichik tumanda shaharning bosh rejasiga asosan ko‘p qavatli turar joy binosini qurish uchun 0,525 gektar hududda olganiga izoh bergan.
Qurilish bosh boshqarmasi 2020-yil 25-avgust kuni arxitektura-rejalashtirish topshirig‘ini tasdiqlagan hamda gaz, elektr, suv ta’minoti va kanalizatsiya tarmoqlariga ulanish texnik shartlarni bergan. Shuningdek, xatda qayd etilishicha, ekologik ekspertiza xulosasi ham olingan.
12 qavatli turar joy binosini qurish uchun Rossiyaning “UDS-Injiniring” kompaniyasi bilan 24-avgustda imzolangan shartnomaga binoan mamlakatda birinchi marta temir-beton konstruksiyalar asosida loyiha-smeta hujjatlari tayyorlangan.
Zarafshan Golden Group’ning ma’lum qilishicha, obyektning moslashishi uchun ma’lum bir vaqt talab etilgani, shu sababli hujjatlarni rasmiylashtirish jarayoni cho‘zilgan. Adaptatsiya ishlari “ToshuyjoyLITI” kompaniyasi tomonidan yakunlangan.
“Obyektda faqat poydevor yotqizish uchun chuqur qazish ishlari yakunlangan va qurilish sohasini nazorat qilish bo‘yicha hududiy inspeksiyaning ko‘rsatmasi bilan 9-fevral kuni loyiha-smeta hujjatlari, davlat ekspertizasi va uning inspeksiyada ro‘yxatdan o‘tkazilishi tasdiqlangunga qadar qurilish ishlari to‘xtatilgan”, — deyiladi xabarda.
Avvalroq Qurilish vazirligi Toshkentda bir qator ko‘p qavatli turar joy binolari noqonuniy qurilayotgani aniqlansa-da, qurilish ishlari to‘xtatilmaganini, Qashqadaryoda qurilish talablarini buzgan bir qancha kompaniyalarga chora ko‘rilganini ma’lum qilgandi. Samarqandda 2020-yil qurilish sohasida 2385 ta qonun buzilishiga yo‘l qo‘yilgani aniqlangandi.
Izoh (0)