So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.
Yaponiyaning Tokio shahri va unga yondosh uchta prefektura (Kanagava, Saytama va Tiba)da koronavirus pandemiyasi tufayli kiritilgan favqulodda holat rejimi bekor qilindi va ba’zi cheklovlar olib tashlandi.
Poytaxtda kasallanish holatlarining kamayishi tufayli shunday qaror qabul qilindi. Shunga qaramay, mamlakat hukumati virusning yanada tarqalib ketishiga yo‘l qo‘ymaslik uchun oldini oluvchi choralar sifatida bir qator cheklovlarni kuchda qoldirdi. Xususan, kompaniyalarga o‘z ishchilarini masofadan ishlashda qoldirish tavsiya etildi.
Bar va restoranlar 20:00 da yopilgan bo‘lsa, endi ularning ish vaqti bir soatga cho‘zildi.
Sakura daraxti gullaydigan davrda poytaxt hukumati Ueno bog‘idagi daraxtlar atrofiga to‘siq o‘rnatdi, shuningdek, shaharliklarga o‘rindiqlarda uzoq vaqt o‘tirish taqiqlandi.
Fevral oxirida Yaponiya hukumati vaksinatsiya uchun Pfizer vaksinalari yetishmayotganini ma’lum qilgandi. Shu sababli davlat keksa yoshli aholini emlash bo‘yicha dastlabki rejani sekinlashtirishga majbur bo‘lgan edi.
So‘nggi bir kecha-kunduzda Tokioda 256 kishida koronavirus aniqlangan. Butun pandemiya davrida esa poytaxtning 117 517 nafar aholisi virusga chalingan.
Jons Hopkins universiteti ma’lumotlariga ko‘ra, Yaponiyada 455 212 kishi COVID-19’ni yuqtirib olgan, 8,8 ming kishi vafot etgan.
Hindistonda o‘tgan bir kecha-kunduzda 43 846 kishida COVID-19 aniqlangan — bu o‘tgan yil noyabr oyi o‘rtalaridan buyon qayd etilgan eng yuqori ko‘rsatkich. Kasallik avj olishi tufayli ba’zi shtatlar ommaviy yig‘ilishlarga nisbatan taqiqni qaytadan kuchga kiritdi.
Xususan, Hindistonning moliyaviy poytaxti Mumbay joylashgan markaziy Maxarashtra shtatiga kasallanish bo‘yicha yangi holatlarning qariyb yarmi to‘g‘ri keladi. Shtat ba’zi tumanlarda oy oxirigacha karantin joriy qildi.
Ayni paytgacha Hindistonda 11,5 million kishi koronavirusga chalingan. Mamlakat kasallanish ko‘rsatkichlari bo‘yicha dunyoda AQSh va Braziliyadan keyingi uchinchi o‘rinda turibdi.
Yevrokomissiya rahbari Ursula fon der Lyayyen Yevroittifoqda qashshoq mamlakatlar bilan COVID-vaksinalarni bo‘lishish imkoniyati yo‘q, deb hisoblaydi. Bu haqda u Germaniyaning Funke Mediangruppe nashriga bergan intervyusida ma’lum qildi.
“Hozir Yevroittifoqqa a’zo davlatlar vaksinalarni o‘zlari olishi uchun ularga favqulodda bosim o‘tkazilmoqda”, — dedi fon der Lyayyen.
Shu bilan birga, Yevroittifoq kambag’al mamlakatlarga vaksinalardan foydalanish imkoniyatini taqdim etuvchi COVAX xalqaro tashabbusini moliyaviy jihatdan qo‘llab-quvvatlamoqda, dedi Lyayyen.
“Yevroittifoq ushbu tashabbusga 2,2 milliard yevro investitsiya kiritdi. COVAX 52 ta mamlakatga 30 million doza vaksina yetkazib berishga ulgurdi”, — dedi u.
Yevrokomissiya rahbari fikricha, Yevroittifoqning o‘zida vaksinalar bilan bog‘liq vaziyat yaxshilanganidan keyingina uning boshqa mamlakatlarga vaksinalarni to‘g‘ridan to‘g‘ri xayriya qilish mexanizmi ishga tushadi.
Shuningdek:
- Iyul o‘rtalariga kelib, Yevropada koronavirusga qarshi jamoaviy immunitet shakllanishi mumkin. “Bugun biz iyun oxirigacha 300 dan 350 milliontagacha dozada vaksina yetkazib berish imkoniyatiga egamiz, demak, 14-iyulgacha (Bastiliyaning olinishi kuni — Fransiya milliy bayrami) bizda qit’a darajasida immunitetga erishish imkoniyati bor”, — dedi ichki bozor masalalari bo‘yicha yevrokomissar Tyerri Breton.
- Yevropaga Rossiyaning koronavirusga qarshi “Sputnik V” vaksinasi kerak bo‘lmaydi. Tyerri Bretonning so‘zlariga ko‘ra, Yevroittifoq doirasida boshqa to‘rtta vaksina allaqachon ma’qullangan, jamoaviy immunitetga erishish uchun shularning o‘zi yetarli bo‘ladi.
- Fransiyaning Marsel shahrida karantin tufayli karnavalga yig‘ilgan 6,5 ming kishi tarqatib yuborildi. Buning uchun politsiya ko‘zni yoshlantiruvchi gazdan foydalandi. Politsiya ma’lum qilishicha, tadbir ishtirokchilarining Mutlaq ko‘pchiligi niqob taqmagan va ijtimoiy masofa saqlamagan. Ulardan dastlab tarqalish talab qilingan, hech kim quloq solmagach, politsiya ko‘zni yoshlantiruvchi gazni ishga solgan.
- Niderlandiyaning Amsterdam shahrida esa COVID-19 bo‘yicha cheklov choralariga qarshi norozilik aksiyalari bo‘lib o‘tdi, unda 150 dan ortiq odam qo‘lga olindi. Amsterdamdagi Muzey maydoniga 300 ga yaqin odam to‘plangan. Politsiyaning tarqalish talabiga rioya qilinmagach, ular suv zambaraklari yordamida tarqatilgan.
Izoh (0)