Японияда фавқулодда ҳолат бекор қилинди, Ҳиндистонда коронавирусга чалинишлар сони рекорд даражада ўсди, Евроиттифоқ вакциналар билан бўлишишга тайёр эмас ва бошқа коронахабарлар

Сўнгги бир кеча-кундузда юз берган коронавирус билан боғлиқ энг муҳим хабарлар — «Дарё» коронадайжестида.

Япониянинг Токио шаҳри ва унга ёндош учта префектура (Канагава, Сайтама ва Тиба)да коронавирус пандемияси туфайли киритилган фавқулодда ҳолат режими бекор қилинди ва баъзи чекловлар олиб ташланди.

Пойтахтда касалланиш ҳолатларининг камайиши туфайли шундай қарор қабул қилинди. Шунга қарамай, мамлакат ҳукумати вируснинг янада тарқалиб кетишига йўл қўймаслик учун олдини олувчи чоралар сифатида бир қатор чекловларни кучда қолдирди. Хусусан, компанияларга ўз ишчиларини масофадан ишлашда қолдириш тавсия этилди.

Бар ва ресторанлар 20:00 да ёпилган бўлса, энди уларнинг иш вақти бир соатга чўзилди.

Сакура дарахти гуллайдиган даврда пойтахт ҳукумати Уэно боғидаги дарахтлар атрофига тўсиқ ўрнатди, шунингдек, шаҳарликларга ўриндиқларда узоқ вақт ўтириш тақиқланди.

Февраль охирида Япония ҳукумати вакцинация учун Pfizer вакциналари етишмаётганини маълум қилганди. Шу сабабли давлат кекса ёшли аҳолини эмлаш бўйича дастлабки режани секинлаштиришга мажбур бўлган эди.

Сўнгги бир кеча-кундузда Токиода 256 кишида коронавирус аниқланган. Бутун пандемия даврида эса пойтахтнинг 117 517 нафар аҳолиси вирусга чалинган.

Жонс Ҳопкинс университети маълумотларига кўра, Японияда 455 212 киши COVID-19’ни юқтириб олган, 8,8 минг киши вафот этган.

Ҳиндистонда ўтган бир кеча-кундузда 43 846 кишида COVID-19 аниқланган — бу ўтган йил ноябрь ойи ўрталаридан буён қайд этилган энг юқори кўрсаткич. Касаллик авж олиши туфайли баъзи штатлар оммавий йиғилишларга нисбатан тақиқни қайтадан кучга киритди.

Хусусан, Ҳиндистоннинг молиявий пойтахти Мумбай жойлашган марказий Махараштра штатига касалланиш бўйича янги ҳолатларнинг қарийб ярми тўғри келади. Штат баъзи туманларда ой охиригача карантин жорий қилди.

Айни пайтгача Ҳиндистонда 11,5 миллион киши коронавирусга чалинган. Мамлакат касалланиш кўрсаткичлари бўйича дунёда АҚШ ва Бразилиядан кейинги учинчи ўринда турибди.

Еврокомиссия раҳбари Урсула фон дер Ляйен Евроиттифоқда қашшоқ мамлакатлар билан COVID-вакциналарни бўлишиш имконияти йўқ, деб ҳисоблайди. Бу ҳақда у Германиянинг Funke Mediangruppe нашрига берган интервьюсида маълум қилди.

«Ҳозир Евроиттифоққа аъзо давлатлар вакциналарни ўзлари олиши учун уларга фавқулодда босим ўтказилмоқда», — деди фон дер Ляйен.

Шу билан бирга, Евроиттифоқ камбағал мамлакатларга вакциналардан фойдаланиш имкониятини тақдим этувчи COVAX халқаро ташаббусини молиявий жиҳатдан қўллаб-қувватламоқда, деди Ляйен.

«Евроиттифоқ ушбу ташаббусга 2,2 миллиард евро инвестиция киритди. COVAX 52 та мамлакатга 30 миллион доза вакцина етказиб беришга улгурди», — деди у.

Еврокомиссия раҳбари фикрича, Евроиттифоқнинг ўзида вакциналар билан боғлиқ вазият яхшиланганидан кейингина унинг бошқа мамлакатларга вакциналарни тўғридан-тўғри хайрия қилиш механизми ишга тушади.

Шунингдек:

• Июль ўрталарига келиб, Европада коронавирусга қарши жамоавий иммунитет шаклланиши мумкин. «Бугун биз июнь охиригача 300 дан 350 миллионтагача дозада вакцина етказиб бериш имкониятига эгамиз, демак, 14 июлгача (Бастилиянинг олиниши куни — Франция миллий байрами) бизда қитъа даражасида иммунитетга эришиш имконияти бор», — деди ички бозор масалалари бўйича еврокомиссар Тьерри Бретон.
• Европага Россиянинг коронавирусга қарши «Спутник V» вакцинаси керак бўлмайди. Тьерри Бретоннинг сўзларига кўра, Евроиттифоқ доирасида бошқа тўртта вакцина аллақачон маъқулланган, жамоавий иммунитетга эришиш учун шуларнинг ўзи етарли бўлади.
• Франциянинг Марсель шаҳрида карантин туфайли карнавалга йиғилган 6,5 минг киши тарқатиб юборилди. Бунинг учун полиция кўзни ёшлантирувчи газдан фойдаланди. Полиция маълум қилишича, тадбир иштирокчиларининг Мутлақ кўпчилиги ниқоб тақмаган ва ижтимоий масофа сақламаган. Улардан дастлаб тарқалиш талаб қилинган, ҳеч ким қулоқ солмагач, полиция кўзни ёшлантирувчи газни ишга солган.
• Нидерландиянинг Амстердам шаҳрида эса COVID-19 бўйича чеклов чораларига қарши норозилик акциялари бўлиб ўтди, унда 150 дан ортиқ одам қўлга олинди. Амстердамдаги Музей майдонига 300 га яқин одам тўпланган. Полициянинг тарқалиш талабига риоя қилинмагач, улар сув замбараклари ёрдамида тарқатилган.