O‘zbekistonda elektromobillar uchun avtotransport yig‘imini to‘lashni bekor qilish taklif etilmoqda, deb xabar bermoqda “Gazeta.uz”. Bu haqda Soliq kodeksiga o‘zgartirish va qo‘shimchalar kiritish to‘g‘risidagi Moliya vazirligi tomonidan ishlab chiqilgan qonun loyihasida qayd etilgan.
Ayni paytda avtomobillarni sotib olganlik yoki O‘zbekistonga vaqtinchalik olib kirganlik uchun yig‘im avtomobil egalari tomonidan uni Ichki ishlar vazirligida ro‘yxatdan o‘tkazishda to‘lanadi. Yangi (foydalanishda bo‘lmagan) avtotransport vositalari bo‘yicha (bundan O‘zbekistonda ishlab chiqarilgan avtotransport vositalari mustasno) yig‘im miqdori xarid qilish narxining 3 foizini tashkil etadi.
Ushbu yig‘imni bekor qilish Vazirlar Mahkamasining 2020-yil 29-dekabrdagi qarorida ko‘zda tutilgandi.
Amaldagi Soliq kodeksiga ko‘ra, avtotransport vositalarini sotib olish va (yoki) O‘zbekiston hududiga vaqtinchalik olib kirish uchun yig‘imni to‘lashdan bolalar uylari, barcha guruhlardagi nogironligi bo‘lgan shaxslar (jami 8 toifa) ozod qilingan. Qonun loyihasi bilan ushbu ro‘yxatga elektromobillarni sotib oluvchi va O‘zbekiston hududiga vaqtinchalik olib kirishni amalga oshiruvchi shaxslarni kiritish taklif etilmoqda.
Davlat statistika qo‘mitasi ma’lumotlariga ko‘ra, O‘zbekistonda 2020-yilda 2,9 million dollar sarflanib, xorijdan 131 ta elektromobil import qilingan. Taqqoslash uchun, 2019-yilda bu ko‘rsatkich 39, 2018-yilda esa 13 tani tashkil qilgan.
Ayni paytda O‘zbekistonda elektromobillar importi boj va aksiz solig‘idan ozod qilingan.
Izoh (0)