Давлат хавфсизлик хизмати томонидан Тошкент шаҳри, Фарғона ва Наманган вилоятларида ўтказилган тадбирлар натижасида гиёҳванд моддалар савдоси билан боғлиқ бир неча ҳолатга чек қўйилди. Бу ҳақда «Дарё»га ДХХ матбуот хизмати хабар берди.
Хусусан, ДХХ Қашқадарё вилояти бошқармаси ҳамда Тошкент шаҳар божхона бошқармаси ҳамкорлигида ўтказилган тезкор тадбирда Тошкентнинг Чилонзор тумани ҳудудида Денов —Тошкент йўналишида киракашлик билан шуғулланувчи фуқаро бошқарувидаги автомашина тўхтатилган. Автомашина холислар иштирокида кўздан кечирилганда, унинг юкхонасида Денов шаҳридан почта сифатида бериб юборилган автомобиль эҳтиёт қисми ичига яширилган 965 грамм опий гиёҳванд моддаси борлиги маълум бўлган ва процессуал тарзда расмийлаштириб олинган.
Аниқланишича, мазкур гиёҳвандлик воситасининг эгаси Чилонзор туманида яшовчи фуқаро М.Н. бўлиб, уни деновлик А.У. 6 500 долларга сотиб олган. Тезкор тадбир доирасида ҳар икки шахс ҳибсга олинди. Ушбу фуқаролар муқаддам гиёҳванд моддалар савдоси билан боғлиқ жиноят содир этганликлари учун жиноий жавобгарликка тортилган бўлса-да, лекин хатоларидан тўғри хулоса чиқармаган.
ДХХ Фарғона вилояти бошқармаси ходимлари томонидан ўтказилган тезкор тадбирда гиёҳванд моддалар савдоси билан шуғулланиб келган бир гуруҳ шахс жиноят устида қўлга олинди.
Фарғона туманида истиқомат қилувчи ушбу фуқаролардан келгусида сотиш мақсадида яшириб қўйилган 3 килограмм 14 грамм гашиш гиёҳванд моддаси ашёвий далил сифатида олинган. Аниқланишича, Қирғизистоннинг Боткен вилояти Қадамжой туманида яшовчи шахсдан 15 минг долларига сотиб олинган ушбу гиёҳвандлик воситаси контрабанда йўли билан Ўзбекистонга олиб келинган.
ДХХ Наманган вилояти бошқармаси ҳамда вилоят божхона бошқармаси ходимлари томонидан ўтказилган тезкор тадбирда эса Наманган шаҳрида ҳаракатланаётган Cobalt тўхтатилиб текширилганда, йўловчи сифатида кетаётган Учқўрғон шаҳрида яшовчи, муқаддам судланган А.А.га тегишли спорт сумкасида 787 грамм гашиш моддаси борлиги аниқланган.
Терговга қадар текширув давомида А.А. Қирғизистондан контрабанда йўли билан олиб ўтилган ушбу гиёҳванд моддани Наманган шаҳрида истиқомат қилувчи, муқаддам судланган М.М.га бериши кераклиги аниқланган ва тезкор тадбир давом эттирилиб, мазкур шахс ҳам қўлга олинган.
Поп туманида жойлашган «Наманган» ЙПХ масканида Наманган—Тошкент йўналишида ҳаракатланаётган Nexia тўхтатилиб текширилганда, унда йўловчи сифатида кетаётган Учқўрғон туманида яшовчи Қирғизистон фуқароси Х.А.нинг ёнида 392 грамм гашиш моддаси борлиги аниқланиб, тегишли тартибда расмийлаштириб олинган. Фуқаро уни сотиш мақсадида Тошкент шаҳрига олиб кетаётган бўлган.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, уларнинг жиноий шерикларини аниқлаш бўйича ҳам чора-тадбирлар амалга оширилмоқда.
Изоҳ (0)