Toshkentda prokuratura va DXX hamkorligida o‘tkazilgan tadbirda qalbaki kupyuralar bilan savdo qiluvchi bir guruh shaxslarning faoliyatiga chek qo‘yildi, deb xabar beradi Bosh prokuratura huzuridagi departament.
Ma’lum qilinishicha, Bosh prokuratura huzuridagi departament va DXXning Mirobod tuman bo‘limi tomonidan tezkor tadbir o‘tkazilgan. Tadbirda O.S. ismli shaxs va boshqalar oldindan til biriktirib, fuqaro S.ga 50 AQSh dollari kupyuradagi 16 dona qalbaki 800 dollarni 500 AQSh dollariga sotgan vaqtida ushlangan.
Tadbir davomida O.S.ning yonidan yana 7 dona qalbaki 50 kupyuradagi 350 AQSh dollari borligi aniqlanib, ashyoviy dalil sifatida olingan.
Mazkur holat yuzasidan fuqaro O.S. va boshqalarga nisbatan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari olib borilmoqda.
Avvalroq Zangiotada qalbaki 5 ming dollarni muomalaga kiritmoqchi bo‘lgan shaxslar ushlangani, Toshkentda qalbaki 5,5 ming yevroni sotmoqchi bo‘lgan shaxs qo‘lga olingani, Namanganda 200 dona 100 dollarlik qalbaki kupyurani muomalaga kiritmoqchi bo‘lgan shaxslar ushlangani hamda Toshkentda to‘yda sochish uchun yuzta 100 ming so‘mlik kupyura yasagan shaxslarga jinoyat ishi qo‘zg‘atilgani haqida xabar berilgandi.
Izoh (0)