Тошкентда прокуратура ва ДХХ ҳамкорлигида ўтказилган тадбирда қалбаки купюралар билан савдо қилувчи бир гуруҳ шахсларнинг фаолиятига чек қўйилди, деб хабар беради Бош прокуратура ҳузуридаги департамент.
Маълум қилинишича, Бош прокуратура ҳузуридаги департамент ва ДХХнинг Миробод туман бўлими томонидан тезкор тадбир ўтказилган. Тадбирда О.С. исмли шахс ва бошқалар олдиндан тил бириктириб, фуқаро С.га 50 АҚШ доллари купюрадаги 16 дона қалбаки 800 долларни 500 АҚШ долларига сотган вақтида ушланган.
Тадбир давомида О.С.нинг ёнидан яна 7 дона қалбаки 50 купюрадаги 350 АҚШ доллари борлиги аниқланиб, ашёвий далил сифатида олинган.
Мазкур ҳолат юзасидан фуқаро О.С. ва бошқаларга нисбатан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари олиб борилмоқда.
Аввалроқ Зангиотада қалбаки 5 минг долларни муомалага киритмоқчи бўлган шахслар ушлангани, Тошкентда қалбаки 5,5 минг еврони сотмоқчи бўлган шахс қўлга олингани, Наманганда 200 дона 100 долларлик қалбаки купюрани муомалага киритмоқчи бўлган шахслар ушлангани ҳамда Тошкентда тўйда сочиш учун юзта 100 минг сўмлик купюра ясаган шахсларга жиноят иши қўзғатилгани ҳақида хабар берилганди.
Изоҳ (0)