Қашқадарё вилоятининг Қарши шаҳрида Мудофаа вазирлиги ҳарбий хизматчиларига беш қаватли, 30 хонадонли янги уй калитлари топширилди, дея хабар берди «Дарё» мухбири.
Маълум бўлишича, 2021 йил 19 март куни вилоятда бўлиб ўтган Наврўз тантаналари давомида ҳоким Зоир Мирзаев бир гуруҳ санъаткорлар билан бирга ҳарбий хизматчиларга янги хонадон калитларини топширган.
«Қарши шаҳрининг ‘Рогузар’ маҳалласидаги мазкур беш қаватли 30 хонадонли уй Мудофаа вазирлигининг ҳарбий хизматлари учун барпо этилган бўлиб, уйнинг умумий қиймати 4 миллиард 944 миллион сўмни ташкил қилади. Мазкур уй ҳарбий хизматчиларга имтиёзли тарзда берилди», — дейди «Қишлоққурилишинвест» МЧЖ инжиниринг компаниясининг вилоят филиали директори Қўйли Нарзуллаев.
Қўйли Нарзуллаевнинг маълумот беришича, «Қишлоққурилишинвест» МЧЖ инжиниринг компанияси буюртмаси асосида вилоятда 2009—2020 йиллар давомида намунавий лойиҳа асосида 15 798 та уй-жой барпо этилган бўлиб, аҳолига имтиёзли тарзда етказиб берилган.
«22 йилдан бери Тошкент ҳарбий округига қарашли ҳарбий қисмларда хизмат қилиб келаман. Наврўз байрами арафасида арзимас хизматимни инобатга олиб, Қарши шаҳридан замонавий хонадон калитини топширишди. Бундан мен ва оилам жуда хурсандмиз», — дейди ҳарбий хизматчи Сирожиддин Холмирзаев.
Таъкидланишича, 2017—2020 йилларда вилоятда «Қишлоққурилишинвест» МЧЖ инжиниринг компанияси буюртмаси асосида раҳбар ходимлар учун 175 та, Мудофаа вазирлиги ҳарбий хизматчиларига 264 та, ФВВ ҳарбийларига 30 та, Миллий гвардия ходимларига 75 та, ИИБ ходимларига 135 та, ДХХ ҳарбийлари учун 210 та, ёш оилалар учун 150 та, оғир ижтимоий аҳволга тушиб қолган аёллар учун 264 та, профилактика инспекторлари учун 568 та турар жой қурилиб, фойдаланишга топширилган.
