25 ta mamlakatdan keladigan talabalar, aspirantlar va ordinatorlarga ta’limni davom ettirish uchun Rossiya hududiga kirish imkoniyati berildi, deb yozadi “RBK” Rossiya Ilm-fan va oliy ta’lim vazirligiga tayanib.
“Shuni hisobga olish kerakki, faqat ‘Rospotrebnadzor’ tomonidan xavfsiz epidemiologik sharoitga ega deb topilgan mamlakatlar fuqarolarigina o‘qish uchun Rossiyaga kirishi mumkin”, deyiladi xabarda.
Rossiyaga kirish huquqini quyidagi mamlakatlar talabalari qo‘lga kiritdi:
- Abxaziya
- Belarus
- Ozarbayjon
- Vyetnam
- Armaniston
- Gretsiya
- Misr
- Hindiston
- Qozog‘iston
- Maldiv orollari
- Qatar
- Birlashgan Arab Amirliklari
- Qirg‘iziston
- Seyshel orollari
- Kuba
- Serbiya
- Tanzaniya
- Singapur
- Finlyandiya
- Turkiya
- Shveysariya
- Efiopiya
- Janubiy Koreya
- Yaponiya
- Janubiy Osetiya
Chet ellik talabalar universitetni Rossiyaga yetib borishi haqida elektron pochta orqali kamida o‘n kun avval xabardor qilishi, so‘ng ikki marta: Rossiyaga kirishdan uch kun oldin va mamlakatga kirgandan keyin PZR-test topshirishi kerak. Ikkinchi test javoblari chiqqunicha xorijlik talabalar yashash joyida o‘z-o‘zini yakkalash rejimiga amal qilishi lozim.
Eslatib o‘tamiz, Rossiya ta’lim va ilm-fan vazirining buyrug‘i bilan 8-fevraldan boshlab ushbu vazirlik huzuridagi oliy o‘quv yurtlarida kunduzgi o‘qish jarayoni boshlandi. 2020-yilning 13-noyabridan buyon talabalar masofaviy tarzda o‘qiyotgandi.
16-fevral kuni “Rospotrebnadzor” aviaqatnov tiklangan mamlakatlardan kelayotgan xorijlik talabalar uchun ayrim talablar evaziga o‘qishiga ruxsat bergan edi. O‘zbekiston TIV 16-fevral holatiga Rossiya O‘zbekiston fuqarolarining kirib kelishlari, jumladan, o‘qish maqsadida kelishlari uchun o‘rnatilgan cheklovlarni bekor qilmaganini ma’lum qilgandi.
Izoh (0)