Samarqand viloyati Kattaqo‘rg‘on tumanida harbiy xizmatga jo‘natishni va’da qilgan shaxsga nisbatan jinoyat ishi qo‘zg‘atildi, deya xabar qilmoqda Bosh prokuratura huzuridagi departament matbuot xizmati.
Ma’lum qilinishicha, departamentning Kattaqo‘rg‘on tuman bo‘limi tomonidan tergovga qadar tekshiruv o‘tkazilgan.
Tekshiruvda fuqaro U.T. fuqaro K.N.ni harbiy xizmatga jo‘natish hamda shartnoma asosida harbiy xizmatda qolish masalasini harbiy xizmatda ishlovchi tanishlari orqali ijobiy hal qilib berish evaziga 3 500 AQSh dollarni firibgarlik yo‘li bilan qo‘lga kiritganligi aniqlangan.
Mazkur holat yuzasidan U.T.ga nisbatan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Farg‘onada ichki ishlar organlariga ishga kiritib qo‘yish uchun ayoldan 2 ming dollar talab qilganlar qo‘lga olingani, Toshkentda qizi va yigit o‘rtasidagi munosabatlarni sir saqlash uchun yigitning otasidan pul talab qilgan ayolga jinoyat ishi qo‘zg‘atilgani hamda Toshkent viloyatida avtomashinasini jarima maydonchasidan chiqarib berishni so‘rab, YPX xodimiga 5 mln so‘m pora taklif qilgan haydovchi qo‘lga olingani haqida xabar berilgandi.
Izoh (0)