Сурхондарёнинг Сариосиё туманидаги «Шарғункўмир» кўмир конини электр токи ўчганда фавқулодда ҳолатда шошилинч электр энергияси билан таъминловчи генераторнинг икки аккумуляторини ўғирлаб кетган шахсларга жиноят иши қўзғатилди. Бу ҳақда ИИВ Тергов департаменти хабар берди.
Маълум қилинишича, «Шарғункўмир» АЖнинг Хитой бўлими директорининг молиявий ишлар бўйича ўринбосари Ге Ченг Ҳуи Сариосиё тумани ИИБ бошлиғига ариза билан мурожаат қилиб, 13 март куни номаълум шахслар «Шарғункўмир» АЖнинг Хитой бўлимига тегишли доимий электр токи ўчганда фавқулодда ҳолатда шошилинч кўмир конини электр энергияси билан таъминловчи генераторнинг жами нархи 17 миллион 790 минг сўмлик 2 дона аккумуляторини яширин равишда ўғирлаб кетганини маълум қилган.
Олиб борилган тезкор қидирув ҳаракатлари давомида ушбу жиноятни АЖ «Шарғункўмир» туннели ишчиси 21 ёшли С.У. ва муқаддам судланган 28 ёшли О.Й.лар содир этгани, улар ўғирланган 2 дона аккумуляторни дарахт тагига яшириб қўйгани аниқланиб, ашёвий далил тариқасида расмийлаштириб олинган.
Ҳолат юзасидан Сариосиё тумани ИИБ ҳузуридаги Тергов бўлинмаси томонидан С.У. ва О.Й.га нисбатан Жиноят кодексининг 169-моддаси (ўғрилик) 2-қисми «в» ва «г» бандлари билан жиноят иши қўзғатилган.
Ҳозирда тергов ҳаракатлари олиб борилмоқда.
Изоҳ (0)