Surxondaryo viloyati Denov tumanida Nexia avtomobili kanalga tushib ketishi natijasida bir yigit vafot etdi, yana biri shifoxonaga yotqizildi, deya xabar berilmoqda “Zamon” informatsion dasturida.
Qayd etilishicha, 1999-yilda tug‘ilgan fuqaro 2021-yil 16-mart kuni taxminan soat 16:00 larda Denov tumani “Obod turmush” mahallasidan o‘tuvchi mahalliy 4N-587 avtomobil yo‘lining 6-kilometrida otasiga tegishli bo‘lgan Nexia rusumli mashinasida harakatlanib ketayotib, ortiqcha tezlik tufayli boshqaruvni yo‘qotgan.
Oqibatda ko‘prik temir ustuniga urilib, Qorasuv kanaliga tushib ketgan. Haydovchining o‘zi voqea joyida halok bo‘lgan.
Mashina salonida bo‘lgan haydovchining tengdoshi jarohat olib, shifoxonaga yotqizilgan.
Ushbu voqeadan so‘ng Qorasuv kanalidan o‘tuvchi ko‘prik juda torligi sabab piyodalar va velosipedchilar harakatlanishi uchun maxsus yo‘lak qurilishi boshlangan.
Bundan avval Qarshida yo‘lni kesib o‘tayotgan bolalar Lacetti ostida qolgani, Namanganda erining mashinasini boshqargan ayol YPX xodimini urib yuborib, voqea joyidan qochib ketgani hamda Buxoroda xizmat mashinasida yo‘l qoidasini buzgan PPX xodimi 735 ming so‘m jarimaga tortilgani haqida xabar berilgandi.
Izoh (0)