Bonhams auksioni orqali harbiylar uchun mo‘ljallangan 1943-yilda ishlab chiqarilgan GMC DUKW amfibiyasi sotuvga qo‘yildi. Ikkinchi jahon urushi davrida Britaniya qurolli kuchlari uchun xizmat qilgan mashinadan qo‘shinlar va yuklarni tashishda foydalanilgan. Omon qolgan nusxa 18-20 ming funt sterlingga baholanmoqda, deb xabar beradi Motor.
GMC DUKW’ni yaratish ustida General Motors kompaniyasi muhandislari Sparkman & Stephens firmasi mutaxassislari bilan ishlagan. Konstruktorlar bu turdagi amfibiyadan jami 353 nusxa yaratgan bo‘lib, ulardan Britaniya qurolli kuchlari foydalangan. Sotuvga qo‘yilgan mashina 1943-yilda Qirollik transport korpusining 19-desant eskadrilyasiga yuborilgan.
Olti g‘ildirakli mashina 2300 kilogramm yuk yoki 24 nafar harbiy xizmatchini yer va suvda tashishga mo‘ljallangan. Amfibiya 91 ot kuchiga ega 4,4 litrli GMC Model 270 dvigateli yordamida harakatga kelgan. DUKW quruqlikda soatiga 80 kilometr, suvda esa olti uzel (11 kilometr) tezlikda harakatlana olgan.
Mazkur nusxa jangovar harakatlarda bevosita ishtirok etgan yoki etmagani noma’lum. Urushdan so‘ng omon qolgan amfibiya 1970-yillarda Buyuk Britaniyadagi Qirollik transport korpusi muzeyiga topshirilgan.
Harbiy amfibiya sotilishidan oldin uning barcha yoqilg‘isi to‘kib olingan. Bundan tashqari, sotuvchining ma’lum qilishicha, potensial xaridor mashinani vaqti-vaqti bilan restavratsiya qilib turishi kerak bo‘ladi.
Avvalroq Rossiyada Ikkinchi jahon urushiga oid nemis yo‘ltanlamas-amfibiyasi 160 ming dollarga sotilayotgani to‘g‘risida xabar berilgandi.
Izoh (0)