Turkmaniston prezidenti Gurbanguli Berdimuhamedov 16-mart kuni Axal viloyatining yangi poytaxti qurilishini ko‘zdan kechirar ekan, aholiga tibbiy xizmat ko‘rsatish darajasini oshirish mavzusiga to‘xtalib o‘tdi. Bu haqda “Xronika Turkmenistana” xabar berdi.
Foto: Google Images
Turkmaniston Davlat axborot agentligining xabar berishicha, davlat rahbari tez tibbiy yordam xizmatlari zamonaviy talablarga javob berishi, kiruvchi qo‘ng‘iroqlar va ularning bajarilishi raqamli shaklda boshqarilishi kerakligini aytgan.
Prezident jahon amaliyotida qo‘llaniladigan 112 yoki 911 raqamlarini (yagona raqam yordamida favqulodda vaziyatlar xizmatlariga qo‘ng‘iroqlarni taqdim etish tizimi) sinovdan o‘tkazishni taklif qildi. Xususan, 112 raqamiga qo‘ng‘iroq qilinganda, tegishli xizmat yordamga muhtoj shaxsning joylashgan joyini aniqlay oladi hamda tibbiyot muassasasi kasalxonaga yotqizilganidan so‘ng bemorning tibbiy kartasiga kirish huquqini qo‘lga kiritishi mumkin.
“Bu tibbiy xizmatning samaradorligi, kiruvchi qo‘ng‘iroqning muhimlik va murakkablik darajasini aniqlashdagi afzalliklarni ko‘rsatib beradi”, — dedi davlat rahbari.
Avvalroq Turkmaniston parlamenti “Xizmat ko‘rsatgan itboqar” va “Xalq itboqari” faxriy unvonlarini ta’sis etish to‘g‘risidagi qonun loyihalarini qabul qilgani haqida xabar berilgandi.
Turkmaniston prezidenti Gurbanguli Berdimuhamedov ushbu faxriy unvonlar sovrindorlari uchun ko‘krak nishonlarining eskizlarini shaxsan tasdiqlagan.
Eslatib o‘tamiz, Berdimuhamedov Turkmaniston poytaxtining yubileyi kuni tug‘ilgan birinchi chaqaloqqa Ashxobod deb ism qo‘yishni buyurgan. Shuningdek, u teatrlarda “xalqning baxtli hayoti” to‘g‘risidagi spektakllar yo‘qligi sabab madaniyat vaziriga hayfsan bergan.
Shu bilan birga, Turkmaniston prezidenti ikkinchi sun’iy yo‘ldoshni uchirishni va yuk samolyotlarini sotib olishni buyurgani, sanoat sektori ishini tanqid qilib, “Turkmanximiya” rahbariga qattiq tanbeh bergani hamda olimlarga kartoshka hosildorligini oshirishni buyurgani haqida xabar berilgandi.
