Қўқон давлат педагогика институти ижарада турувчи талабаларни тизимли назорат қилувчи смартфон ва планшетлар учун «QDPI Ijara» деб номланган махсус мобил дастурни ишга туширди, деб хабар беради ЎзА.
Маълумотларга кўра, мазкур олий таълим муассасасида бугунги кунда 8 мингдан ортиқ йигит-қиз таҳсил олмоқда, уларнинг 608 нафари талабалар ётоқхонасида туради, 1520 нафари эса ижарада яшайди.
Таъкидланишича, бошқа жойларда бўлгани каби бу ерда ҳам талабаларни турар жой билан таъминлаш, ижарада яшовчи талабалар билан индивидуал ишлашда ўз ечимини кутаётган муаммолар бор.
Мазкур ишлар доирасида янгиликка қўл урилиб, электрон дастур яратилган. «Мобил дастурда ижарада яшайдиган талабалар ҳақида тўлиқ маълумот олиш, уларнинг манзилларини харитада кўрсатиб бериш, ижара манзилига қадар бошлаб бориши билан талабаларнинг устоз-мураббийлари, ота-оналари, институт раҳбарияти учун беминнат ёрдамчи бўлди», — дейилади хабарда.
Мобил дастур ҳозирча Android тизимида ишловчи қурилмалар учун мўлжалланган бўлиб, тез кунларда унинг iOS операцион тизимлари учун версияси ҳам фойдаланишга тақдим этилиши режалаштирилган. «QDPI Ijara» иловасини Қўқон давлат педагогика институти расмий сайтидан юклаб олиш мумкин.
Эслатиб ўтамиз, февраль охирида Тошкентнинг Юнусобод туманида беш нафар талаба ўлик ҳолда топилгани, улардан бири Инҳа университетининг 1-босқич талабаси эканлиги тўғрисида хабар берилган эди. Фожиадан сўнг ижарада яшаётган талабаларнинг шароитлари ўрганиладиган бўлди.
Изоҳ (0)