Нукусда коронавирусга чалинганлар касалхонасида ишлаган икки ҳамширанинг рағбатлантириш пуллари тўлаб бериладиган бўлди

Нукус шаҳар тиббиёт бирлашмасида короновирус инфекциясига гумон қилинган беморларни диагностик саралаш ва даволаш учун мўлжалланган марказда ишлаган, лекин рағбатлантириш пуллари тўлиқ тўлаб берилмаган икки фуқаронинг муаммоаси ижобий ҳал этилди. Бу ҳақда Нукус шаҳар адлия бўлимига таяниб, «Kar24.uz» хабар берди.

Маълум қилинишича, икки нафар ҳамшира рағбатлантириш пуллари тўлиқ тўлаб берилмаганидан норози бўлиб, Нукус шаҳар адлия бўлимига мурожаат қилган.

Ўрганишлар давомида фуқаролар Н.Х. ва А.Д. COVID-19 инфекциясига чалинган беморларни даволашга ихтисослашган махсус касалхонага айлантирилган Республика ўйин турлари ва енгил атлетика бўйича ихтисослаштирилган болалар ва ўсмирлар спорт мактабига Нукус шаҳар тиббиёт бирлашмасининг буйруқларига асосан ҳамшира қилиб бириктирилгани маълум бўлди. Улар марказда ҳақиқатан ҳам кунига 12 соатдан (фуқаролар Н.Х. 360 соат, А.Д. 324 соат) ишлагани аниқланган.

Таъкидланишича, бирлашма томонидан тасдиқланган табелда фуқаролар Н.Х., А.Д. кунлик 8 соатдан ишлаган деб нотўғри кўрсатилган.

Вазирлар Маҳкамасининг 2020 йил 24 сентябрдаги 583-сонли қарори билан «Коронавирус инфекцияси билан касалланган беморларни даволаш объектларида ҳамда коронавирус инфекциясини аниқлаш лабораторияларида фаолият олиб бораётган ходимларга махсус рағбатлантириш тўловларини тўлаш тартиби тўғрисида»ги низом тасдиқланган. Тиббиёт бирлашмаси эса ушбу низомда келтирилган махсус тўловларни икки ҳамширага тўлаб бермаган.

Шу боис адлия бўлими томонидан бирлашмага «қонун ҳужжатларининг бузилиши, уларнинг сабаблари ва унга олиб келувчи шарт-шароитларни бартарф қилиш» тўғрисидаги тақдимнома киритилган, бироқ тиббиёт  бирлашмаси томонидан бўлимнинг қонуний талаблари бажарилмасдан, тақдимнома қаноатлантирилмаган.

Юқоридаги ҳолатлардан келиб чиқиб, фуқароларнинг бузилган ҳуқуқларини ҳимоя қилиш мақсадида Фуқаролик ишлари бўйича Нукус туманлараро судига даъво ариза киритилган, даъво аризага асосан фуқаро Н.Х.га 7 миллион сўм ва фуқаро Д.А.га 6,75 миллион сўм ундириб бериш тўғрисида суднинг ҳал қилув қарори чиқарилган.

Аввалроқ Тошкентда коронавирусга чалинган ҳамширадан олиб қолинган 12 миллион сўм миқдоридаги солиқ тўловлари ундириб берилган эди.

Коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.