Jo Bayden ma’muriyatida Debora Xolend AQShning yangi ichki ishlar vaziri etib tayinlandi. Kongress Senati uning nomzodini ma’qulladi. Xolend Qo‘shma Shtatlarning Vazirlar Mahkamasida faoliyat yuritgan tarixdagi birinchi tub aholi vakili bo‘ldi. Bu haqda The New York Times gazetasiga tayanib “RBK” xabar berdi.
Xolendni ichki ishlar vaziri lavozimiga tasdiqlash uchun 51 nafar senator (faqat to‘rt nafari respublikachilar) ovoz berdi, 40 nafari qarshi chiqdi.
Pueblo xalqi vakili bo‘lgan 60 yoshli Debora Xolend Nyu-Meksiko shtatidan AQSh Vakillar palatasi a’zosi hisoblanadi, 2018-yilda u kongressning quyi palatasiga saylangan birinchi ikki hindu ayollardan biriga aylandi, deb ta’kidladi nashr.
Yangi lavozimida Xolend federal yerlardan foydalanish va tabiiy resurslarni qazib olish, AQShning 1,9 million tub aholisi va yo‘qolib ketish xavfi ostida bo‘lgan turlarini himoya qilish masalalari bilan shug‘ullanadi.
Bayden 2020-yil noyabr oyida AQShda bo‘lib o‘tgan prezidentlik saylovlarida g‘alaba qozongandi, 56 yoshli Kamala Harris vitse-prezident bo‘ldi — bu lavozimdagi birinchi ayol (va birinchi qora tanli) bo‘ldi. Pentagonga ham birinchi marta afroamerikalik Lloyd Ostin rahbarlik qildi.
Avvalroq Irlandiya hukumati 2020-yilning dekabrida homiladorligi haqida xabar bergan adliya vaziri Xelen Makentiga tug‘ruq ta’tili berdi. Ta’til berish to‘g‘risida qaror qabul qilishdan oldin bir necha oy muhokamalar o‘tkazilgan, chunki davlat qonunchiligida saylangan siyosatchilar uchun bunday ta’tillar ko‘zda tutilmagan.
Izoh (0)