Президент Шавкат Мирзиёев 15 март куни 2021 йилда электр энергетикаси соҳасида амалга ошириладиган лойиҳалар билан танишди.
Маълум қилинишича, аҳоли ва иқтисодиёт тармоқларининг электр энергиясига бўлган талаби йилдан йилга ортиб бормоқда. Буни таъминлаш мақсадида эскирган подстанциялар ва узатиш тармоқлари босқичма-босқич янгилаб келинмоқда.
Хусусан, 2021 йил магистрал электр тармоқлари бўйича умумий қиймати 140 миллион доллар бўлган 6 та лойиҳа режалаштирилган. Улардан бири 14 та подстанцияни модернизация қилиш лойиҳасидир. Бунинг самарасида Қорақалпоғистон ва вилоятларда жами 1 минг 430 мегаватт қўшимча қувват яратилади. Ушбу подстанциялардаги йиллик электр энергияси исрофи 1,5 миллион долларга, таъмирлашга сарфланадиган харажатлар қарийб 16 миллион долларга камаяди. Ҳисобга олиш тизимидаги хатоликлар барҳам топади.
Қолган 5 та лойиҳа янги подстанциялар ва магистрал электр узатиш тармоқларини қуриш ҳамда тиклашга қаратилган.
Паст кучланишли электр тармоқларини модернизация қилиш бўйича ҳам кенг кўламли ишлар белгиланган. Хусусан, 15 минг километр электр узатиш тармоқларини, 4 мингта трансформаторни янгилаш чоралари кўрилган. Бу ишлар натижасида Ўзбекистондаги 5 минг 377 та маҳалланинг электр таъминоти яхшиланади.
Президент бу лойиҳаларнинг иқтисодий самарадорлиги ва ижтимоий аҳамиятини алоҳида таъкидлаб, уларни сифатли бажариш, электр энергияси таъминоти барқарорлигини ошириш бўйича топшириқлар берди.
Бундан аввал Хоразмга кучли шамол ва қор бўрони ёпирилгани сабаб вилоятдаги кўплаб хонадонлар электр энергиясисиз қолгани, Ўзбекистонда 1,35 млрд долларга яна учта электр станцияси қурилиши ҳамда Тошкентда 2021 йил охирига қадар барча ёқилғи қуйиш шохобчаларида электрокарларни қувватлантириш мумкин бўлиши ҳақида хабар берилганди.
Изоҳ (0)