Toshkent viloyatining Angren shahrida joylashgan maktablarning birida yuqori sinf o‘quvchilari o‘rtasida janjal sodir bo‘ldi. O‘quvchilardan biri og‘ir tan jarohati bilan shifoxonaga yotqizilgan, deb xabar beradi Tergov departamenti.
“9-mart soat 11:00 larda maktabning 10-sinf o‘quvchisi 16 yoshli Akmal maktab hududida 11-sinf o‘quvchisi 17 yoshli Oybek bilan janjallashib qolgan va bir-biriga kim zo‘rligini ko‘rsatib qo‘ymoqchi bo‘lgan. Akmal Oybekning jag‘ qismiga mushti bilan urgani oqibatida yerga yiqilib, bosh miya yopiq sinishi, ensa suyak sinishi kabi jarohatlar olgan”, — deyiladi xabarda.
Mazkur holat yuzasidan Angren shahar IIB huzuridagi Tergov bo‘limi tomonidan voyaga yetmagan Akmalga nisbatan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan jinoyat ishi qo‘zg‘atilib, gumon qilinuvchi tariqasida jalb qilingan. Hozirda tergov harakatlari olib borilmoqda.
Ma’lumot uchun, bu turdagi jinoyatlar uchun Jinoyat kodeksining normalariga ko‘ra, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi tayinlanadi.
Avvalroq “Singapur” va “Vestminster” talabalari o‘rtasida sodir bo‘lgan ommaviy mushtlashuv sodir bo‘lgani, shuningdek, Toshkentdagi kafelarning birida 45 kishi ishtirokida janjal yuzaga kelgani to‘g‘risida xabar berilgandi.
Izoh (0)