Тошкент вилоятининг Ангрен шаҳрида жойлашган мактабларнинг бирида юқори синф ўқувчилари ўртасида жанжал содир бўлди. Ўқувчилардан бири оғир тан жароҳати билан шифохонага ётқизилган, деб хабар беради Тергов департаменти.
«9 март соат 11:00 ларда мактабнинг 10-синф ўқувчиси 16 ёшли Акмал мактаб ҳудудида 11-синф ўқувчиси 17 ёшли Ойбек билан жанжаллашиб қолган ва бир-бирига ким зўрлигини кўрсатиб қўймоқчи бўлган. Акмал Ойбекнинг жағ қисмига мушти билан ургани оқибатида ерга йиқилиб, бош мия ёпиқ синиши, энса суяк синиши каби жароҳатлар олган», — дейилади хабарда.
Мазкур ҳолат юзасидан Ангрен шаҳар ИИБ ҳузуридаги Тергов бўлими томонидан вояга етмаган Акмалга нисбатан Жиноят кодексининг 104-моддаси 1-қисми (қасддан баданга оғир шикаст етказиш) билан жиноят иши қўзғатилиб, гумон қилинувчи тариқасида жалб қилинган. Ҳозирда тергов ҳаракатлари олиб борилмоқда.
Маълумот учун, бу турдаги жиноятлар учун Жиноят кодексининг нормаларига кўра, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш жазоси тайинланади.
Аввалроқ «Сингапур» ва «Вестминстер» талабалари ўртасида содир бўлган оммавий муштлашув содир бўлгани, шунингдек, Тошкентдаги кафеларнинг бирида 45 киши иштирокида жанжал юзага келгани тўғрисида хабар берилганди.
Изоҳ (0)