Putin va Lukashenko Sochida muzokaralar o‘tkazdi. Keyin ular chang‘i va qor mototsikllarida birga sayr qildi (video)

Rossiya va Belarus prezidentlari Vladimir Putin va Aleksandr Lukashenko Krasnaya Polyanadagi qarorgohda muzokara o‘tkazdi, deya xabar bermoqda Meduza.

Suhbatning ochiq qismida prezidentlar iqtisodiy masalalar va koronavirus bilan bog‘liq vaziyatni muhokama qildi. Lukashenko, xususan, Belarus iqtisodiyotiga yordam bergani uchun Putinga minnatdorchilik bildirdi va Rossiyaning “Sputnik V” vaksinasi dunyodagi eng samarali vaksina ekanligiga ishonch bildirdi.

Uchrashuvda Rossiya va Belarus chegaralari orqali avtomobil aloqasini tiklash masalasi ham muhokama qilindi. Transport aloqasi yozgacha tiklanishi kutilmoqda.

Prezidentlar o‘rtasidagi muzokaralar taxminan bir yarim soat davom etdi, shundan so‘ng ular chang‘i va qor mototsikllarida uchishdi. Shundan so‘ng uchrashuv rasmiy kechki ovqat tarzida davom etishi rejalashtirilgan.

So‘nggi marta Putin va Lukashenko 2020-yil sentabr oyida – minglab odamlarning noroziligiga sabab bo‘lgan Belarusdagi prezidentlik saylovlaridan bir oy o‘tib uchrashgan. Ushbu uchrashuv ham Sochida bo‘lib o‘tgan edi.

Bundan avval Rossiyada COVID-19’ga qarshi uchinchi vaksina ro‘yxatdan o‘tkazilgani, Kreml Putinda nima sababdan general unvoni yo‘qligiga izoh bergani hamda Lukashenko smartfonlardan voz kechishga chaqirgani haqida xabar berilgandi.