Buyuk Britaniya va Yevropa Ittifoqi o‘rtasidagi yangi savdo aloqalarining birinchi oyida eksport va import hajmi keskin tushib ketdi. Bu haqda Reuters nashriga tayanib “Korrespondent.net” xabar berdi.
Yevropa Ittifoqiga tovar eksporti, monetar bo‘lmagan oltin va boshqa qimmatbaho metallarni hisobga olmaganda, yanvar oyida 40,7 foizga kamaydi. Import hajmi esa 28,8 foizga tushdi, deyiladi Britaniya Milliy statistika boshqarmasining axborotida.
Boshqarmaning ogohlantirishicha, koronavirus pandemiyasi sharoitida Brexit’ning savdodagi asoratlarini baholash juda murakkablashgan va bu savdo hajmiga ham ta’sir qilgan.
Ma’lumot uchun, Fransiya markaziy banki rahbari Fransua Vilrua de Galo 2021-yil boshida o‘tkazilgan an’anaviy matbuot anjumanida Brexit allaqachon Fransiya iqtisodiyotiga ba’zi ingliz kompaniyalari va ularning aktivlarini o‘ziga og‘dirib olishga yordam berganini aytgandi.
Eslatib o‘tamiz, Buyuk Britaniya va Yevropa Ittifoqi 2020-yil dekabr oyida Brexit’dan keyingi o‘zaro hamkorlik shartlarini kelishib olgan va Birlashgan Qirollik 2021-yil 1-fevral kuni 47 yillik a’zolikdan so‘ng Yevropa Ittifoqini tark etgan. Yanvar oyida Bloomberg nashri Buyuk Britaniyaning Yevroittifoqdan chiqish haqidagi qarori mamlakat iqtsodiyotiga 132,8 milliard funt sterling (173,8 milliard dollar)ga tushganini ma’lum qilgandi.
Izoh (0)