Буюк Британия ва Европа Иттифоқи ўртасидаги янги савдо алоқаларининг биринчи ойида экспорт ва импорт ҳажми кескин тушиб кетди. Бу ҳақда Reuters нашрига таяниб «Korrespondent.net» хабар берди.
Европа Иттифоқига товар экспорти, монетар бўлмаган олтин ва бошқа қимматбаҳо металларни ҳисобга олмаганда, январь ойида 40,7 фоизга камайди. Импорт ҳажми эса 28,8 фоизга тушди, дейилади Британия Миллий статистика бошқармасининг ахборотида.
Бошқарманинг огоҳлантиришича, коронавирус пандемияси шароитида Brexit’нинг савдодаги асоратларини баҳолаш жуда мураккаблашган ва бу савдо ҳажмига ҳам таъсир қилган.
Маълумот учун, Франция марказий банки раҳбари Француа Вильруа де Гало 2021 йил бошида ўтказилган анъанавий матбуот анжуманида Brexit аллақачон Франция иқтисодиётига баъзи инглиз компаниялари ва уларнинг активларини ўзига оғдириб олишга ёрдам берганини айтганди.
Эслатиб ўтамиз, Буюк Британия ва Европа Иттифоқи 2020 йил декабрь ойида Brexit’дан кейинги ўзаро ҳамкорлик шартларини келишиб олган ва Бирлашган Қироллик 2021 йил 1 февраль куни 47 йиллик аъзоликдан сўнг Европа Иттифоқини тарк этган. Январь ойида Bloomberg нашри Буюк Британиянинг Евроиттифоқдан чиқиш ҳақидаги қарори мамлакат иқцодиётига 132,8 миллиард фунт стерлинг (173,8 миллиард доллар)га тушганини маълум қилганди.
Изоҳ (0)