Ayollarning iqtisodiy jarayonlardagi ishtirokining gender tengsizligi kamayishi natijasida 2050-yilga kelib global YaIM 20 trillion dollarga yetadi, deyiladi Bloomberg iqtisodchilari tomonidan o‘tkazilgan tadqiqotda. Bu haqda “Interfaks” xabar berdi.
Hisobotda rivojlangan va rivojlanayotgan 36 mamlakat ko‘rib chiqildi hamda koronavirus pandemiyasining ishchi kuchi vakillariga ayollarning ta’siri tahlil qilindi. Tadqiqot natijalariga ko‘ra, dunyoda 25 yoshdan 60 yoshgacha bo‘lgan ayollarning faqatgina 58,4 foizi ish bilan ta’minlangan, aynan shu yoshdagi erkaklarning esa 92,1 foizi o‘z ish joyiga ega.
Ishlaydigan ayollarning sonini oshirishni ko‘zda tutuvchi siyosat yaqin o‘ttiz yillikda iqtisodiy o‘sish jarayonini tezlashtirishga qodir, deyiladi hisobotda. Bu o‘zgarishlar o‘rta ta’lim olish imkoniyatini, bolalar parvarishiga yordamni va ish vaqtining moslashuvchanligini o‘z ichiga oladi.
Bu tadqiqotning guvohlik berishicha, mehnat bozorida gender tengsizligining qisqarishi koronavirus pandemiyasidan keyin jahon iqtisodiyotining qayta tiklanishida va keyingi davrda hal qiluvchi ahamiyatga ega, deb ta’kidladi Bloomberg. So‘nggi bir yil ichida Qo‘shma Shtatlarda ko‘plab ayollar pandemiya paytida bolalar bog‘chalari va maktablarning yopilishi sababli farzandlariga qarash uchun ishidan bo‘shadi.
Hisobotda tahlil qilingan mamlakatlar orasida ayollarning mehnat bozoridagi ishtirokining eng past darajasi 16,6 foiz bilan Hindistonda qayd etildi. Iqtisodchilarning hisob-kitoblariga ko‘ra, erkaklar va ayollar bandlik darajasi o‘rtasidagi farqni yo‘q qilish 2050-yilda jahon YaIMni 30 foizga oshirishi mumkin.
“Qo‘shimcha ishchi kuchini samarali ish o‘rinlari bilan ta’minlash imkoniyatiga ega bo‘lish uchun mamlakatlar yaxshilab o‘ylashi va o‘z iqtisodiyotlarini qayta rejalashtirishi kerak. Ko‘pgina mamlakatlarda ayollarning o‘qishi va ish bilan ta’minlanishidagi to‘siqlar chuqur ildiz otgan”, — deydi hisobot mualliflaridan biri, Bloomberg iqtisodchisi Adriana Dupit.
Avvalroq BMT Xavfsizlik kengashining norasmiy yig‘ilishida BMT bosh kotibining siyosiy masalalar bo‘yicha o‘rinbosari Rozamariy DiKarlo davlat boshqaruvidagi erkaklar va ayollar ulushi 130 yil ichida tenglashishi mumkinligini aytgan edi.
Izoh (0)