Аёлларнинг иқтисодий жараёнлардаги иштирокининг гендер тенгсизлиги камайиши натижасида 2050 йилга келиб глобал ЯИМ 20 триллион долларга етади, дейилади Bloomberg иқтисодчилари томонидан ўтказилган тадқиқотда. Бу ҳақда «Интерфакс» хабар берди.
Ҳисоботда ривожланган ва ривожланаётган 36 мамлакат кўриб чиқилди ҳамда коронавирус пандемиясининг ишчи кучи вакилларига аёлларнинг таъсири таҳлил қилинди. Тадқиқот натижаларига кўра, дунёда 25 ёшдан 60 ёшгача бўлган аёлларнинг фақатгина 58,4 фоизи иш билан таъминланган, айнан шу ёшдаги эркакларнинг эса 92,1 фоизи ўз иш жойига эга.
Ишлайдиган аёлларнинг сонини оширишни кўзда тутувчи сиёсат яқин ўттиз йилликда иқтисодий ўсиш жараёнини тезлаштиришга қодир, дейилади ҳисоботда. Бу ўзгаришлар ўрта таълим олиш имкониятини, болалар парваришига ёрдамни ва иш вақтининг мослашувчанлигини ўз ичига олади.
Бу тадқиқотнинг гувоҳлик беришича, меҳнат бозорида гендер тенгсизлигининг қисқариши коронавирус пандемиясидан кейин жаҳон иқтисодиётининг қайта тикланишида ва кейинги даврда ҳал қилувчи аҳамиятга эга, деб таъкидлади Bloomberg. Сўнгги бир йил ичида Қўшма Штатларда кўплаб аёллар пандемия пайтида болалар боғчалари ва мактабларнинг ёпилиши сабабли фарзандларига қараш учун ишидан бўшади.
Ҳисоботда таҳлил қилинган мамлакатлар орасида аёлларнинг меҳнат бозоридаги иштирокининг энг паст даражаси 16,6 фоиз билан Ҳиндистонда қайд этилди. Иқтисодчиларнинг ҳисоб-китобларига кўра, эркаклар ва аёллар бандлик даражаси ўртасидаги фарқни йўқ қилиш 2050 йилда жаҳон ЯИМни 30 фоизга ошириши мумкин.
«Қўшимча ишчи кучини самарали иш ўринлари билан таъминлаш имкониятига эга бўлиш учун мамлакатлар яхшилаб ўйлаши ва ўз иқтисодиётларини қайта режалаштириши керак. Кўпгина мамлакатларда аёлларнинг ўқиши ва иш билан таъминланишидаги тўсиқлар чуқур илдиз отган», — дейди ҳисобот муаллифларидан бири, Bloomberg иқтисодчиси Адриана Дупит.
Аввалроқ БМТ Хавфсизлик кенгашининг норасмий йиғилишида БМТ бош котибининг сиёсий масалалар бўйича ўринбосари Розамарий ДиКарло давлат бошқарувидаги эркаклар ва аёллар улуши 130 йил ичида тенглашиши мумкинлигини айтган эди.
Изоҳ (0)