Germaniyada oltita federal hukumat organi Microsoft’ning elektron pochta tizimi orqali kiberhujumlarga uchradi. Bu haqda axborot xavfsizligi bo‘yicha federal boshqarma (BSI) axborotiga tayanib DPA nashri xabar qilgan.
Boshqarma idoralar nomini oshkor etmagan, biroq to‘rtta holatda axborotni o‘zlashtirish kuzatilgan bo‘lishi mumkinligini ma’lum qilgan.
BSI 5-mart kuni mamlakatdagi tashkilot va idoralarni ogohlantirgan, barcha hukumat organlari kiberhujumga uchrashi mumkinligini bildirgandi.
Avvalroq Microsoft AQShdagi davlat idoralariga qilingan kiberhujumlar ortida Xitoy hukumati turganini taxmin qilgan. Xakerlar Xitoy hukumati moliyalashtirgan Hafnium guruhi vakillari bo‘lishi mumkin.
Shuningdek, AQShdagi 20 mingdan ziyod xususiy kompaniyalar va davlat tuzilmalari, shuningdek, Yevropa va Osiyodagi o‘nlab tashkilotlar Microsoft kompaniyasi tomonidan ishlab chiqilgan, xabarnomalar almashinuvini ta’minlovchi Exchange Server dasturi tufayli xakerlar hujumiga uchragani, AQSh 2020-yil oxirida hukumat muassasalariga uyushtirilgan keng ko‘lamli xakerlik hujumiga javoban Rossiyaga qarshi keyingi uch hafta ichida bir nechta kiberhujumlarni boshlashi haqida xabarlar berilgan.
Izoh (0)