Twitter’да Libneko ники остидаги фойдаланувчи провайдер қурилмадаги ижтимоий тармоқ ишини секинлаштираётганини аниқлайдиган сервисни яратди, деб хабар беради Esquire.
Сайт Twitter фойдаланадиган «Abs.twimg.com» доменидан суратни юклаб олади ва унинг юкланиш тезлигини ўлчайди. Таъкидланишича, бу каби текширув бир дақиқага яқин вақт олади. Сервис олинган маълумотни ушбу суратнинг бошқа сервислардаги юкланиш тезлиги билан таққослайди.
Сервис кейинчалик ўтказиладиган таҳлиллар учун фойдаланувчиларнинг аноним маълумотларини тўплайди, масалан, IP манзили ёки уланиш тезлиги.
Эслатиб ўтамиз, 10 март куни «Роскомнадзор» кутилмаганда Россия ҳудуди бўйлаб Twitter’нинг ишлашини барча мобил қурилмалар ва компьютерларнинг ярмида секинлаштиришини маълум қилганди. Идора шу орқали Twitter’ни Россия қонунчилигига бўйсунишга мажбур этиб, россияликларнинг «нохолис контент таъсиридан» ҳимоя қилмоқчи.
«Роскомнадзор»нинг маълум қилишича, агарда ижтимоий тармоқ Россия қонунчилиги талабларини эътибордан четда қолдираверса, уни блоклаш учун янги чоралар қўлланилади.
Аввалроқ TikTok ўз жонига қасд қилишни тарғиб қилувчи видеороликларни блоклаётганини маълум қилган эди. 2 март куни Россиянинг бир қатор шаҳарларида, шу жумладан, Москвада мактаб маъмурияти ота-оналарга ижтимоий тармоқларда ўспиринларнинг ўз жонига қасд қилишига чақирувчи видеороликлар пайдо бўлаётгани тўғрисида огоҳлантирувчи хабарлар юборган. «Роскомнадзор» томонидан TikTok’да бундай видеороликларнинг тарқалгани тасдиқланди ва кузатувчи органларнинг аралашувидан сўнг ижтимоий тармоқ ушбу контентларни тармоқдан олиб ташлаган.
Изоҳ (0)