АҚШ ва Хитой ўртасидаги савдо уруши давом этмоқда. Apple ва Google смартфонлар ишлаб чиқаришни Ҳиндистонга кўчириш ниятида

Apple ва Google компанияси ўзларининг смартфон ишлаб чиқарувчи корхоналарини Ҳиндистонга кўчираётгани тўғрисида хабарлар пайдо бўлди, деб ёзади Hi-Tech.Mail.ru.

Apple’нинг ҳозирда Ҳиндистонда заводи мавжуд бўлиб, у ерда ўрта даражадаги моделлар йиғилади — икки-уч йил олдинги моделлар. Эндиликда компания биринчи бор актуал моделлари, янги iPhone 12 линейкасини ҳам Хитойдан ташқарида ишлаб чиқариш ниятида. iPhone 12’ни Ҳиндистонда йиғишга Apple’нинг Хитойдаги асосий шериги — Тайваннинг Foxconn компанияси масъул бўлади.

Reuters’нинг ҳисоботида ёзилишича, iPhone 12’ни ишлаб чиқаришни Ҳиндистонга кўчириш ишлари Хитой ва АҚШ ўртасида давом этаётган савдо уруши сабаб амалга оширилмоқда. Умуман олганда, Apple Ҳиндистонга 2017 йилда — икки мамлакат ўртасидаги муносабатлар ёмонлашишидан олдин эътибор қаратган, шу йили компаниянинг мамлакатдаги биринчи заводи иш бошлаган эди.

Шунингдек, Apple iPad планшетлари ва Маc компьютерларини ишлаб чиқаришни ҳам Ҳиндистон ва Вьетнамга кўчирмоқда. Шу билан бирга, Хитойдаги ишлаб чиқариш ҳам тўхтамайди. Афтидан, компания Хитой ҳукумати томонидан жорий этилиши мумкин бўлган санкциялардан ўзини ҳимойлашга уринмоқда.

Google’нинг вазияти эса бошқача. Компания Ҳиндистон бозорининг потенциалини кўрмоқда, шу сабабли ушбу мамлакатдаги улушини ошириш ниятида — 2020 йилда Ҳиндистонга Pixel смартфонларини етказиб бериш икки баробарга ошган.

Компания ўз мақсадига эришиш учун бирданига икки йўналишда ишламоқда — ўрта даражада смартфонларни кўпроқ ишлаб чиқаряпти ва Ҳиндистонда ишлаб чиқаришни йўлга қўйишни режалаштирган. Шу билан бирга, ишлаб чиқарилган смартфон нафақат Ҳиндистоннинг ички бозорига, балки бошқа мамлакатларга ҳам сотилади.

Ҳиндистон иқтисодиёти тобора ўсиб бораётгани сабаб хориж компанияларини ўзига жалб этмоқда — бу каби ҳолат Хитойда 2000 йилларда кузатилган эди.