MDHdagi eng ommabop vaksinalar, Britaniyada aniqlangan yana yangi shtamm, Xitoy vaksinasi bilan emlanadigan Olimpiada ishtirokchilari. Koronaxabarlar

O‘tgan bir kecha-kunduzdagi koronavirus bilan bog‘liq eng muhim xabarlar — “Daryo” dayjestida.

“Sputnik V” va AstraZeneca MDHdagi eng ommabop vaksinalarga aylandi

Mustaqil davlatlar hamdo‘stligi (MDH)ning o‘nta davlatidan yettitasi — Belarus, Moldova, Armaniston va to‘rtta Markaziy Osiyo mamlakati — Rossiyaning ortidan aholini COVID-19’ga qarshi emlash uchun “Sputnik V” vaksinasidan favqulodda foydalanish uchun ruxsat berdi. Va ularning kamida oltitasida ushbu dori emlash uchun allaqachon qo‘llanilmoqda.

Bundan tashqari, “Sputnik V” Rossiyadan tashqari yana ikkita mamlakatda ishlab chiqarilmoqda. Qozog‘istondagi Qarag‘anda farmatsevtika majmuasida mart oyida 150 ming dozada vaksina ishlab chiqarilishi kutilmoqda. Mart oxiridan u Belarusda ham chiqarila boshlaydi. “Sputnik V” ishlab chiqarishni mahalliylashtirish imkoniyati Armaniston va Qirg‘iziston bilan ham muhokama qilinmoqda.

Sobiq ittifoq mamlakatlari (Belarus, Qozog‘iston, Rossiya va Turkmanistondan tashqari) Rossiya vaksinalari bilan birga, COVAX xalqaro platformasi orqali ham vaksinalarni qo‘lga kiritadi. Ushbu dastur orqali yetkaziladigan vaksinalarning katta qismi AstraZeneca Britaniya—Shvetsiya kompaniyasining Covishield dorilaridir. AstraZeneca vaksinalari Moldova, Ukraina va Ozarbayjonda allaqachon qo‘llanilmoqda.

Shunga qaramay, Sobiq ittifoq mamlakatlarida emlash sur’atlari past bo‘lib qolmoqda. Rossiyada vaksinaning kamida bitta dozasini olgan aholi ulushi 3,3 foizga teng — bu MDH mamlakatlari orasidagi eng yuqori ko‘rsatkich.

Ta’kidlash joiz, “Sputnik V” vaksinasini ma’qullagan davlatlar soni 50 taga yetdi. Uni oxirgi bo‘lib Namibiya Respublikasi ma’qulladi.

Britaniyada koronavirusning yangi shtammi aniqlandi

Buyuk Britaniyada avvalroq VUI deb nom berilgan koronavirusning yangi shtammi bilan bog‘liq to‘rtta holat aniqlandi va umumiy holatlar soni o‘ntaga yetdi, shulardan yettitasi Angliyada, uchtasi Shotlandiyada qayd etilgan. Ilk ikkita holat Buyuk Britaniyada 4-mart kuni yaqinda Antiguada bo‘lib qaytgan shaxslarda kuzatilgan edi.

Olimpiya o‘yinlari ishtirokchilari koronavirusga qarshi Xitoy vaksinasi bilan emlanadi

Tokio va Pekindagi Olimpiya va Paralimpiya o‘yinlari ishtirokchilari Xitoyda ishlab chiqarilgan vaksinalar bilan emlanadi. Bu haqda Xalqaro olimpiya qo‘mitasi (XOQ) prezidenti Tomas Bax ma’lum qildi.

Ushbu vaksinalar bilan nafaqat sportchilar va jamoalar, balki Olimpiada va Paralimpiadaga mezbonlik qiluvchi mamlakatlar aholisi ham emlanadi. Xitoy vaksinalarini ishlab chiqarish XOQ tomonidan moliyalashtiriladi va u qo‘shimcha dozalar uchun ham to‘laydi.

Yevropada koronavirusga qarshi to‘rtinchi vaksina ma’qullandi

Yevropa dori vositalari agentligi Johnson & Johnson kompaniyasining koronavirusga qarshi vaksinasini Yevroittifoq hududida qo‘llash uchun ma’qulladi. 18 yoshdan kattalarni vaksinatsiya qilishga ruxsat berildi. Undan foydalanishni boshlash uchun regulyatorning tavsiyasini Yevropa komissiyasi tasdiqlashi kerak.

Johnson & Johnson vaksinasi AQSh, Kanada va Bahraynda ham ma’qullangan. Boshqa ko‘pchilik vaksinalardan farqli o‘laroq, ushbu dorini ikki dozada emas, bitta dozada — bir marta qabul qilish kerak.

Shu paytgacha Yevroittifoqda Pfizer/BioNTech, AstraZeneca va Moderna kompaniyalari vaksinalari foydalanish uchun ma’qullangan. Vaksinalar markazlashgan holda Yevroittifoq darajasida sotib olinadi va aholi soniga proporsional tarzda mamlakatlar bo‘ylab taqsimlanadi.

Pfizer va Novavax vaksinalari COVID-19’ning “britancha” shtammiga qarshi samarali bo‘lib chiqdi

Pfizer/BioNTech kompaniyasining vaksinasi Isroil Sog‘liqni saqlash vazirligi tomonidan o‘tkazilgan tadqiqot chog‘ida COVID-19’ning simptomli holatlarida 97 foiz, simptomsiz holatlarida esa 94 foiz samaradorlik ko‘rsatdi. SSV tomonidan tahlil qilingan holatlarning 80 foizdan ortig‘ida gap koronavirusning birinchi marta Buyuk Britaniyada aniqlangan B.1.1.7 shtammi haqida borgan. Pfizer ma’lum qilishicha, bu vaksinaning B.1.1.7 shtammi bilan kasallanishga qarshi samaradorligini isbotlaydi.

Shuningdek, Amerikaning Novavax biotexnologik kompaniyasi vaksinasi ham “britancha” shtammga qarshi samarali bo‘lib chiqdi. Buyuk Britaniyada o‘tkazilgan klinik sinovlarning uchinchi bosqichi natijalariga ko‘ra, vaksinaning koronavirusning birlamchi variantiga qarshi samaradorligi 96,4 foizni, “britancha” variantga qarshi samaradorligi esa 86,3 foizni tashkil qilgan.