МДҲдаги энг оммабоп вакциналар, Британияда аниқланган яна янги штамм, Хитой вакцинаси билан эмланадиган Олимпиада иштирокчилари. Коронахабарлар

Ўтган бир кеча-кундуздаги коронавирус билан боғлиқ энг муҳим хабарлар — «Дарё» дайжестида.

«Спутник V» ва AstraZeneca МДҲдаги энг оммабоп вакциналарга айланди

Мустақил давлатлар ҳамдўстлиги (МДҲ)нинг ўнта давлатидан еттитаси — Беларусь, Молдова, Арманистон ва тўртта Марказий Осиё мамлакати — Россиянинг ортидан аҳолини COVID-19’га қарши эмлаш учун «Спутник V» вакцинасидан фавқулодда фойдаланиш учун рухсат берди. Ва уларнинг камида олтитасида ушбу дори эмлаш учун аллақачон қўлланилмоқда.

Бундан ташқари, «Спутник V» Россиядан ташқари яна иккита мамлакатда ишлаб чиқарилмоқда. Қозоғистондаги Қарағанда фармацевтика мажмуасида март ойида 150 минг дозада вакцина ишлаб чиқарилиши кутилмоқда. Март охиридан у Беларусда ҳам чиқарила бошлайди. «Спутник V» ишлаб чиқаришни маҳаллийлаштириш имконияти Арманистон ва Қирғизистон билан ҳам муҳокама қилинмоқда.

Собиқ иттифоқ мамлакатлари (Беларусь, Қозоғистон, Россия ва Туркманистондан ташқари) Россия вакциналари билан бирга, COVAX халқаро платформаси орқали ҳам вакциналарни қўлга киритади. Ушбу дастур орқали етказиладиган вакциналарнинг катта қисми AstraZeneca Британия—Швеция компаниясининг Covishield дориларидир. AstraZeneca вакциналари Молдова, Украина ва Озарбайжонда аллақачон қўлланилмоқда.

Шунга қарамай, Собиқ иттифоқ мамлакатларида эмлаш суръатлари паст бўлиб қолмоқда. Россияда вакцинанинг камида битта дозасини олган аҳоли улуши 3,3 фоизга тенг — бу МДҲ мамлакатлари орасидаги энг юқори кўрсаткич.

Таъкидлаш жоиз, «Спутник V» вакцинасини маъқуллаган давлатлар сони 50 тага етди. Уни охирги бўлиб Намибия Республикаси маъқуллади.

Британияда коронавируснинг янги штамми аниқланди

Буюк Британияда аввалроқ ВУИ деб ном берилган коронавируснинг янги штамми билан боғлиқ тўртта ҳолат аниқланди ва умумий ҳолатлар сони ўнтага етди, шулардан еттитаси Англияда, учтаси Шотландияда қайд этилган. Илк иккита ҳолат Буюк Британияда 4 март куни яқинда Антигуада бўлиб қайтган шахсларда кузатилган эди.

Олимпия ўйинлари иштирокчилари коронавирусга қарши Хитой вакцинаси билан эмланади

Токио ва Пекиндаги Олимпия ва Паралимпия ўйинлари иштирокчилари Хитойда ишлаб чиқарилган вакциналар билан эмланади. Бу ҳақда Халқаро олимпия қўмитаси (ХОҚ) президенти Томас Бах маълум қилди.

Ушбу вакциналар билан нафақат спортчилар ва жамоалар, балки Олимпиада ва Паралимпиадага мезбонлик қилувчи мамлакатлар аҳолиси ҳам эмланади. Хитой вакциналарини ишлаб чиқариш ХОҚ томонидан молиялаштирилади ва у қўшимча дозалар учун ҳам тўлайди.

Европада коронавирусга қарши тўртинчи вакцина маъқулланди

Европа дори воситалари агентлиги Johnson & Johnson компаниясининг коронавирусга қарши вакцинасини Евроиттифоқ ҳудудида қўллаш учун маъқуллади. 18 ёшдан катталарни вакцинация қилишга рухсат берилди. Ундан фойдаланишни бошлаш учун регуляторнинг тавсиясини Европа комиссияси тасдиқлаши керак.

Johnson & Johnson вакцинаси АҚШ, Канада ва Баҳрайнда ҳам маъқулланган. Бошқа кўпчилик вакциналардан фарқли ўлароқ, ушбу дорини икки дозада эмас, битта дозада — бир марта қабул қилиш керак.

Шу пайтгача Евроиттифоқда Pfizer/BioNTech, AstraZeneca ва Moderna компаниялари вакциналари фойдаланиш учун маъқулланган. Вакциналар марказлашган ҳолда Евроиттифоқ даражасида сотиб олинади ва аҳоли сонига пропорсионал тарзда мамлакатлар бўйлаб тақсимланади.

Pfizer ва Novavax вакциналари COVID-19’нинг «британча» штаммига қарши самарали бўлиб чиқди

Pfizer/BioNTech компаниясининг вакцинаси Исроил Соғлиқни сақлаш вазирлиги томонидан ўтказилган тадқиқот чоғида COVID-19’нинг симптомли ҳолатларида 97 фоиз, симптомсиз ҳолатларида эса 94 фоиз самарадорлик кўрсатди. ССВ томонидан таҳлил қилинган ҳолатларнинг 80 фоиздан ортиғида гап коронавируснинг биринчи марта Буюк Британияда аниқланган B.1.1.7 штамми ҳақида борган. Pfizer маълум қилишича, бу вакцинанинг B.1.1.7 штамми билан касалланишга қарши самарадорлигини исботлайди.

Шунингдек, Американинг Novavax биотехнологик компанияси вакцинаси ҳам «британча» штаммга қарши самарали бўлиб чиқди. Буюк Британияда ўтказилган клиник синовларнинг учинчи босқичи натижаларига кўра, вакцинанинг коронавируснинг бирламчи вариантига қарши самарадорлиги 96,4 фоизни, «британча» вариантга қарши самарадорлиги эса 86,3 фоизни ташкил қилган.