Yoshlar ishlari agentligi Qashqadaryo viloyati boshqarmasiga yangi rahbar tayinlandi

Yoshlar ishlari agentligining Qashqadaryo viloyati boshqarmasi boshlig‘i Shohjahon Omonovning ishdan ketgani rasman e’lon qilindi. Mazkur boshqarmaga Temurbek Poyonov rahbar etib tayinlandi. Bu haqda agentlikning rasmiy Telegram kanalida xabar berilgan.

“Shu kungacha Yoshlar ishlari agentligining Qashqadaryo viloyati boshqarmasi boshlig‘i lavozimida faoliyat yuritgan Shohjahon Omonov boshqa ishga o‘tishi munosabati bilan egallab turgan lavozimidan ozod etildi va Temurbek Poyonov 2021-yil 10-martdan agentlikning Qashqadaryo viloyati boshqarmasi boshlig‘i vazifasini bajaruvchi etib tayinlandi”, — deyiladi agentlik rasmiy xabarida.

Ta’kidlanishicha, ayni kunga qadar boshqarma boshlig‘i o‘rinbosari lavozimida ishlab kelgan mas’ul boshqarma boshlig‘i lavozimiga tayinlangan.

Eslatib o‘tamiz, avvalroq Yoshlar ishlari agentligi direktori Alisher Sa’dullayev jurnalist va blogerlar bilan muloqotda Shohjahon Omonovni ishdan olish uchun yetarli faktorlarga ega ekanligini aytgani, biroz vaqtdan so‘ng esa uni ishdan olgani va Temurbek Poyonovga ishonch bildirgani xabar berilgandi.

Shohjahon Omonovning ishdan bo‘shatilganini rad etgan Qashqadaryo viloyat hokimligi axborot xizmati esa Omonov hamon lavozimda ekanini xabar berdi. Mazkur xabarga munosabat bildirgan “Daryo” manbalari esa boshqarma boshlig‘i Alisher Sa’dullayev bilan bo‘lgan yig‘ilishda ishdan olinganini takrorlab, “bir-ikki kunda u boshqa ishga o‘tayotganligi sababli lavozimdan olinishini” taxmin qilgandi.