Adliya vazirligi “Ijtimoiy-iqtisodiy munosabatlarda shartnoma instituti rolini tubdan takomillashtirish to‘g‘risida”gi Prezident farmoni loyihasini muhokamaga qo‘ydi.
Hujjatda qayd etilishicha, 2021-yilning 1-mayidan:
- tijorat banklarga yetkazib berilgan mahsulot (bajarilgan ishlar, xizmatlar) uchun to‘lovlarni uchinchi shaxslar hisobidan qabul qilishga qo‘yilgan taqiq;
- davlat ulushi 50 foiz va undan yuqori bo‘lgan xo‘jalik yurituvchi subyektlarning mahsulotlarni (ishlarni, xizmatlarni) yetkazib berish to‘g‘risida tuziladigan shartnomalarida oldindan 15 foiz to‘lovni belgilashga doir talabi;
- qishloq xo‘jaligi va chorvachilik mahsulotlari yetishtiruvchilari va tayyorlov tashkilotlari o‘rtasida tuziladigan shartnomalarda majburiy ravishda avansni belgilashga doir talab;
- notariuslar tomonidan shartnomalarni tasdiqlashda kommunal xizmatlar bo‘yicha qarzdorlikning mavjudligi yoki yo‘qligi to‘g‘risida axborot olish bo‘yicha talab bekor qilinadi.
Qayd etilishicha, jismoniy shaxslarga qarz shartnomalarini notarial tasdiqlash orqali chet el valyutasida qarz berish va qaytarib olishga ham ruxsat beriladi.
Shuningdek loyihada qayd etilishicha, kommunal soha, energiya bilan ta’minlash, aloqa xizmati, yo‘lovchi va yuklarni tashish va boshqa shu kabi katta ijtimoiy ahamiyatga ega bo‘lgan sohalarda tabiiy monopoliya subyektlari tomonidan ishlab chiqilgan ommaviy shartnomalar monopoliyaga qarshi davlat organi bilan kelishilganidan so‘ng iste’molchilar bilan tuziladi.
Izoh (0)