Toshkentdagi “Dikaryom” restorani asoschisi va egasi Artur Rudomyotkin elektr energiyasining o‘chirib qo‘yilishi va bino fasadida soyabonlarning olib tashlanishi bo‘yicha Mirobod tuman hokimligi ustidan shikoyat qildi, deb xabar beradi “Gazeta.uz”.
Uning so‘zlariga ko‘ra, bir necha kun oldin Nukus ko‘chasidagi “Dikaryom” restoraniga Mirobod tuman hokimligi vakillari kelib, “fasadni zudlik bilan bo‘yash talabini qo‘ygan”. Tadbirkor fasad “mineral kroshka” bilan bo‘yalgani uchun uni bo‘yash mumkin emasligini aytgan.
“Ertasi kuni Mirobod tumani hokimi Shuxrat Po‘latovning o‘zi kelib fasaddagi ‘mineral kroshka’ni bo‘yash bema’nilik ekanligiga qo‘shilgan va tez orada muhim delegatsiya bu yerdan o‘tishi sabab fasad hamda barcha soyabonlarni yuvish bo‘yicha topshiriq bergan. Biz rozi bo‘ldik va 9-mart kuni fasadni yuvish uchun 4 million so‘m o‘tkazdik, bu biz uchun kutilmagan xarajat”, — deb yozadi u o‘zining Facebook’dagi sahifasiga.
Restoratorning ta’kidlashicha, 10-mart kuni ertalab Mirobod tuman hokimi kelib, barcha soyabonlarni kesish bo‘yicha topshiriq bergan.
“Yarim soatdan keyin restoranimizda chiroq o‘chdi. Biz muhim ishlarimizni tashlab ‘Hududiy elektr tarmoqlari’ va boshqa instansiyalarga borib, gap nimada ekanligini aniqlashga kirishdik. Keyinroq Mirobod tuman hokimligi xodimi biz bilan bog‘lanib, elektr energiyasi yuqoridagi talablar bartaraf etilmagunicha va soyabonlar, barcha peshlavhalar olingan suratni yubormagunimizcha yonmasligini aytdi (yaxshiyam binoga gaz qo‘yib yuborishmadi). 4 yildan buyon turgan peshlavha kimga xalaqit berdi ekan degan savol tug‘iladi”, — deydi u.
Artur Rudomyotkinning aytishicha, elektr energiyasining o‘chirilishi “katta miqdordagi qimmat turuvchi mahsulotlar va yarim tayyor mahsulotlar”ning buzilishiga, shuningdek, muassasa mehmonlarni qabul qila olmagani uchun daromadsiz qolishiga olib kelishi mumkin. Keyinroq u mahsulotlarning bir qismi utilizatsiya qilinganini aytgan.
“Qachongacha Prezidentimizning barcha davlat xizmatlari xodimlarini tadbirkorlarga yordam berishga chaqirayotganini tinglaymiz, Prezidentning barcha tavsiya va talablari shunchaki bajarilmaslik o‘rniga, aksincha, qarshi chiqmoqda. Farmoyish qayerda? Sud qarori qayerda? Nega bir kun ichida turli amaldorlar kelib, o‘z xohishiga ko‘ra talab qilishlari mumkin? Butun biznesni g‘arq qilmoqchimisiz, davom eting!”, — deya ta’kidlaydi u.
Tadbirkor agarda hokimlik tumanni “obodonlashtirishga yopishgan” bo‘lsa, “restavratsiya qilinishi kerak bo‘lgan barcha fasad va yo‘llarning suratlarini taqdim etishga” tayyorligini bildirgan.
“Gazeta.uz” bilan surhbatda restorator muassasadagi elektr energiyasi ta’minoti taxminan soat 10:00 da o‘chirilgani va soat 18:40 da yoqilganini aytgan.
Mirobod tuman hokimligi matbuot xizmatining ma’lum qilishicha, elektr energiyasining o‘chirilishiga bog‘liq holat “Hududiy elektr tarmoqlari” mutaxassislari tomonidan o‘rganilmoqda. Binoni bo‘yash va peshlavhalarning olib tashlanishi borasidagi talab esa “hozirda o‘rganilmoqda” deb, ta’kidlangan matbuot xizmati xabarida.
Eslatib o‘tamiz, 2020-yilning 0xirida Toshkent markazidagi kafe va restoranlarning noqonuniy qo‘shimcha qurilmalari olib tashlanayotgani to‘g‘risida xabar berilgandi.
Izoh (0)