Avstraliya va Xitoy tadqiqotchilari Xitoyning janubi-sharqidagi Yunnan provinsiyasi mintaqalaridan birida yashovchi ko‘rshapalaklar biomaterialini keng miqyosda o‘rgandi va SARS-CoV-2 bilan bog‘liq koronavirusning to‘rtta genomini topdi, deyiladi bioRxiv’da chop etilgan tadqiqot hisobotida. Bu haqda “RIA Novosti” xabar berdi.
“2019-yilning may oyidan 2020-yil noyabr oyigacha Xitoyning Yunnan provinsiyasidagi kichik mintaqada yashovchi sichqonlarning 23 turidan 411 ta namunani o‘rganib chiqdik... Ushbu ma’lumotlardan biz 24 ta to‘liq uzunlikdagi koronavirus genomlarini, shu jumladan, yangi SARS-CoV-2 bilan bog‘liq to‘rtta va SARS-CoV bilan bog‘liq uchta genomni aniqladik”, — deyiladi hisobotda.
Ushbu viruslardan biri RpYN06 SARS-CoV-2’ga o‘xshash genomik tuzilishga ega, 94,5 foiz mos keladi. Yana uchta SARS-CoV-2 koronaviruslari ilgari Xitoyning Guansi provinsiyasidagi pangolinlarda aniqlangan viruslar bilan deyarli bir xil.
“Bizning tadqiqotimiz mahalliy miqyosda ko‘rshapalaklardagi viruslarning sezilarli xilma-xilligini ko‘rsatib beradi, shuningdek, SARS-CoV-2 va SARS-CoV viruslari Janubi-sharqiy Osiyo va janubiy Xitoyning ulkan geografik mintaqasi bo‘ylab tarqalgan yovvoyi hayvonlar organizmida yashaydi. Ushbu ma’lumotlar SARS-CoV-2 va boshqa patogen viruslarning kelib chiqishini aniqlashga yordam beradi”, — deb ta’kidladi olimlar.
Tadqiqotchilarning aytishicha, bir qancha koronavirus turlari allaqachon aniqlanganiga qaramay, SARS-CoV-2’ning evolyutsion ildizlari haligacha noma’lum. Odamlarda virusli patogenlarning aksariyati dastlab tabiatda paydo bo‘lsa, ba’zida hayvonlardan yuqadi. Ko‘rshapalaklar odamlarda kasallik keltirib chiqaruvchi bir qator viruslarga ega ekani ta’kidlanadi. Masalan, ular Marburg virusi, Ebola virusi va koronavirusning tashuvchisi hisoblanadi. Koronavirus nafaqat odamlarga, balki turli xil uy va yovvoyi hayvonlarga, shu jumladan, cho‘chqalar, mushuklar, itlar, tovuqlar, kiyiklar va tipratikanlarga ham yuqadi.
Izoh (0)