Самарқанд вилоятида ноқонуний қурилишларнинг олдини олиш ва уларни бартараф этиш юзасидан ташкил этилган доимий ишловчи комиссия 2020 йилда вилоятда қурилиш соҳасида 2385 та қонунбузилиш ҳолатини аниқлаган. Бу ҳақда «Дарё»га вилоят бош архитектори Ҳаёт Мирзаев маълум қилди.
Аниқланган қонунбузилишларнинг 808 таси комиссиялар ва маъмурий органлар томонидан бартараф этилган. 90 таси қонун талабларига мувофиқлаштирилган ва 1487 та ҳолат бўйича қонуний чора кўриш ишлари давом этмоқда.
«2020 йилда Қурилиш вазирлиги томонидан ‘Шаффоф қурилиш’ тизими жорий этилган бўлиб, 2021 йил 1 январдан ушбу портал ишга туширилди. Мазкур тизимга 2020 йилда 740 та, 2021 йилнинг шу кунигача 6 та қурилиш объекти киритилди. Бу қурилиш объектларига бириктирилган буюртмачи, лойиҳачи ва қурилиш назорати инспекцияси инспекторларига бу тизимга уланиш учун планшет берилди ва GPSлар ўрнатилган. Натижада инспекторлар томонидан қурилиш объектлари доимий назоратга олиниши босқичма-босқич йўлга қўйилмоқда», — деди Ҳаёт Мирзаев.
Ҳаёт Мирзаэвнинг таъкидлашича, амалга оширилган ишларга қарамасдан юридик ва жисмоний шахслар томонидан ноқонуний қурилишларни ҳамда тегишли рухсат берувчи шаҳарсозлик ҳужжатларисиз қурилиш-монтаж ишларини амалга оширишга нисбатан қонуний чоралар кўриш бўйича ваколатли органлар ҳамда комиссияларнинг реакцияси етарли бўлмаётганлиги натижасида ҳудудларда ўзбошимчалик билан амалга оширилган тартибсиз қурилишлар кўпайиб бормоқда.
«Айниқса, бу каби ҳолатларни хусусий секторлар томонидан олиб борилаётган қурилишларда кўп учратишимиз мумкин. Шунингдек, аксарият хусусий секторлар томонидан қурилиш амалга оширилаётган объэктларда қурилиш маданиятига мутлақо эътибор қаратилмасдан келинмоқда», — дейди масъул.
Мавзуга доир:
Изоҳ (0)