Xitoy—Qirg‘iziston—O‘zbekiston temir yo‘lining qurilishi Rossiya va Qozog‘iston uchun foydasiz. Bu haqda Qirg‘iziston yuk tashuvchilar uyushmasi rahbari Temirbek Shabdanaliyev Tazabek nashriga ma’lum qildi, deb yozmoqda “Gazeta.uz”.
Uning aytishicha, ushbu loyiha 20 yildan ortiq vaqt davomida muhokama qilinmoqda. Ammo bu vaqt ichida u “o‘z o‘rnidan bir qadam ham siljimadi”.
“Ushbu loyiha atrofida quruq muzokaralar juda ko‘p, ammo hech qanday harakat yo‘q. Nima uchun? Chunki bu yirik davlatlar, xususan, Qozog‘iston va Rossiya manfaatlariga ziddir. Biz temiryo‘l qurishni boshlasak, ular bir nechta ko‘rsatkichlarni, masalan, siyosiy nufuzini yo‘qotadi”, — deb hisoblaydi mutaxassis.
“Biz transportda ham, boshqa ko‘plab sohalarda ham o‘z siyosatimizni yuritishda erkinroq bo‘lamiz. Yana bir omili, Qozog‘iston va Rossiya Xitoydan tovarlar olib o‘tishda temiryo‘l monopolistlari hisoblanadi. Rossiya Xitoydan tortilgan juda uzun temiryo‘lga ega. Qozog‘iston bu borada ikkinchi o‘rinda. Qozog‘istonda Xitoy chegarasiga tortilgan temiryo‘l liniyalari ikkitaga yetdi. Shu sababli Qozog‘iston va Rossiya monopoliyasi, ta’siri va avtoritetini yo‘qotishni istamaydi”, — deydi Temirbek Shabdanaliyev.
Tashuvchilar uyushmasi rahbarining aytishicha, mana shu siyosiy ta’sirdir.
“Agar biz temiryo‘l qurishni xohlasak, Qozog‘iston va Rossiya ma’qullashi kerak. Albatta, Rossiya asosiy pozitsiyaga ega. Ammo bu masalada Rossiya doimo sukut saqlagan, na ha, na yo‘q deydi”, — deb qo‘shimcha qilgan u.
Avvalroq O‘zbekiston transport vazirligi matbuot xizmati ham Xitoyni Markaziy Osiyo mamlakatlari bilan bog‘laydigan temiryo‘l liniyasi loyihasi deyarli 20 yildan beri muhokama qilinayotganini qayd etgandi. Tomonlar baland tog‘lar, borishi qiyin bo‘lgan hududlar orqali o‘tadigan ushbu temiryo‘l eni, uning marshrutlari bo‘yicha yagona to‘xtamga kela olmayapti.
Dastlabki hisob-kitoblarga ko‘ra, Xitoy—Qirg‘iziston—O‘zbekiston temiryo‘lining qurilishi Sharqiy Osiyodan yaqin Sharq va Janubiy Yevropaga boradigan yo‘lni 900 kilometrga qisqartiradi va vaqt 7-8 kunga kamayadi. Yo‘l qurilishi Markaziy Osiyo mamlakatlarining transport infratuzilmasini rivojlantirishni ta’minlaydi va ularga Fors ko‘rfazi va Tinch okeanining portlariga qulay kirish imkonini beradi.
Izoh (0)