Тошкентда ободонлаштириш тизимида ишлайдиган хотин-қизларга 8 март муносабати байрам совғалари топширилди. Бу ҳақда шаҳар ҳокимлиги матбуот хизмати хабар бермоқда.
«Шаҳримизнинг тозалиги ва кўкаламзорлаштиришга масъул бўлган 4 127 нафар мунис аёллар ва дилбар қизларга 8 март – Халқаро хотин-қизлар куни муносабати билан Тошкент шаҳар ҳокими номидан байрам совғалари топширилди. Эътибор, эҳтиром, гул ва совғалар аёлларга кўтаринки кайфият бахш этди», — дейилади ҳокимлик ахборотида.
Байрам совғаларини топшириш билан боғлиқ тадбирлардан бири Халқлар дўстлиги майдонида ўтказилган бўлиб, воқеа жойидан олинган видео Telegram’даги оммабоп каналларда эълон қилинган. Унда масъул шахс ободонлаштириш тизимида ишловчи хотин-қизларга мурожаат қилиб, жумладан, шундай деган: «Ҳаммангизни яхши кўрамиз».
Масъулнинг қўшимча қилишича, ободонлаштириш тизимида меҳнат қилувчи хотин-қизларга байрам муносабати билан сўнгги икки йилдан бери электрчойнаклар совға қилинган бўлса, бу йил шаҳар ҳокими Жаҳонгир Ортиқхўжаев номидан дазмоллар туҳфа этилган.
Изоҳ (0)