Venesuelada inflyatsiya fonida 1 mln bolivar nominalga ega pullar muomalaga kiritiladi

8-martdan boshlab Venesuela hukumati 200 ming, 500 ming va 1 million bolivar qiymatga ega yangi banknotalarni muomalaga kiritadi, deb yozadi “RBK” mamlakat Markaziy bankiga tayanib.

“200 ming (0,11 dollar), 500 ming (0,27 dollar) va 1 million suveren bolivar (0,53 dollar) nominalli yangi banknotalar 2021-yil 8-martdan asta-sekinlik bilan muomalaga kiritila boshlaydi”, — deyiladi bank xabarida.

Muassasaning ma’lum qilishicha, yangi kupyuralar milliy iqtisodiyot ehtiyojlarini qondirishi kerak.

Venesuela qariyb uch yildan buyon og‘ir ijtimoiy-iqtisodiy inqirozni boshidan kechirmoqda. 2018-yil yakunlariga ko‘ra, mamlakatda inflyatsiya 1 700 000 foizni tashkil qilgan. 2019-yilda esa inflyatsiya 9585 foizga teng bo‘lgan.

Iqtisodiyotni kuchaytirish choralaridan biri sifatida mamlakat hukumati yangi — suveren bolivar valyutasini kiritdi. Ammo uning kursi ham nihoyat darajada pasayib ketdi: hozir 1 AQSh dollari 1,8 million bolivarga teng.

Avvalroq Venesuela prezidenti Nikolas Maduro Yevropa Ittifoqiga ultimatum e’lon qilib, Yevroittifoq sanksiyalar siyosatini davom ettiradigan bo‘lsa, har qanday dialogdan voz kechish bilan tahdid qilgan edi.

Ma’lumot uchun, 22-fevral kuni Yevropa Ittifoqi Venesuela rasmiylariga qarshi yangi sanksiyalar e’lon qildi. Cheklovlar 19 nafar mansabdor, jumladan, Milliy saylov kengashi prezidenti Indira Alfonso, kengash vitse-prezidenti Leonardo Morales, Qurolli kuchlar strategik operatsiyalar qo‘mondonligi rahbari, admiral Remixio Sebalos Ichaso, shuningdek, Milliy assambleya a’zolari va sudyalarga nisbatan joriy etildi.

Bunga javoban Venesuela hukumati 24-fevral kuni Yevroittifoq elchisi Isabel Brilyante Pedrosoni “xush ko‘rilmagan inson” deb e’lon qildi va unga mamlakatdan chiqib ketish uchun 72 soat muhlat berdi.

Bryussel Venesuelaning diplomatni chiqarib yuborish to‘g‘risidagi qaroridan afsusda ekanini bildirdi va uni qayta ko‘rib chiqishga chaqirdi. Yevroittifoqning fikricha, Karakasning bunday xatti-harakatlari faqat mamlakatni yanada yakkalanishiga olib keladi.

Keyinroq esa Yevropa Ittifoqi Venesuelaning hududdagi doimiy vakilini persona non grata deb e’lon qildi.