Венесуэлада инфляция фонида 1 млн боливар номиналга эга пуллар муомалага киритилади

8 мартдан бошлаб Венесуэла ҳукумати 200 минг, 500 минг ва 1 миллион боливар қийматга эга янги банкноталарни муомалага киритади, деб ёзади «РБК» мамлакат Марказий банкига таяниб.

«200 минг (0,11 доллар), 500 минг (0,27 доллар) ва 1 миллион суверен боливар (0,53 доллар) номиналли янги банкноталар 2021 йил 8 мартдан аста-секинлик билан муомалага киритила бошлайди», — дейилади банк хабарида.

Муассасанинг маълум қилишича, янги купюралар миллий иқтисодиёт эҳтиёжларини қондириши керак.

Венесуэла қарийб уч йилдан буён оғир ижтимоий-иқтисодий инқирозни бошидан кечирмоқда. 2018 йил якунларига кўра, мамлакатда инфляция 1 700 000 фоизни ташкил қилган. 2019 йилда эса инфляция 9585 фоизга тенг бўлган.

Иқтисодиётни кучайтириш чораларидан бири сифатида мамлакат ҳукумати янги — суверен боливар валютасини киритди. Аммо унинг курси ҳам ниҳоят даражада пасайиб кетди: ҳозир 1 АҚШ доллари 1,8 миллион боливарга тенг.

Аввалроқ Венесуэла президенти Николас Мадуро Европа Иттифоқига ультиматум эълон қилиб, Евроиттифоқ санкциялар сиёсатини давом эттирадиган бўлса, ҳар қандай диалогдан воз кечиш билан таҳдид қилган эди.

Маълумот учун, 22 февраль куни Европа Иттифоқи Венесуэла расмийларига қарши янги санкциялар эълон қилди. Чекловлар 19 нафар мансабдор, жумладан, Миллий сайлов кенгаши президенти Индира Алфонсо, кенгаш вице-президенти Леонардо Моралес, Қуролли кучлар стратегик операциялар қўмондонлиги раҳбари, адмирал Ремихио Себалос Ичасо, шунингдек, Миллий ассамблея аъзолари ва судьяларга нисбатан жорий этилди.

Бунга жавобан Венесуэла ҳукумати 24 февраль куни Евроиттифоқ элчиси Исабел Брилянте Педросони «хуш кўрилмаган инсон» деб эълон қилди ва унга мамлакатдан чиқиб кетиш учун 72 соат муҳлат берди.

Брюссель Венесуэланинг дипломатни чиқариб юбориш тўғрисидаги қароридан афсусда эканини билдирди ва уни қайта кўриб чиқишга чақирди. Евроиттифоқнинг фикрича, Каракаснинг бундай хатти-ҳаракатлари фақат мамлакатни янада яккаланишига олиб келади.

Кейинроқ эса Европа Иттифоқи Венесуэланинг ҳудуддаги доимий вакилини persona non grata деб эълон қилди.