AQSh Kongressi Senati koronavirus pandemiyasidan jabr ko‘rgan milliy iqtisodiyotga yordam choralari paketini ma’qulladi, deb yozadi “RBK”. Iqtisodiyotni kuchaytirishga 1,9 trillion dollar yo‘naltiriladi, reja prezident Jo Bayden tomonidan taklif qilingan dasturga asoslangan.
Qonun loyihasini 50 senator qo‘llab-quvvatladi, 49 nafari qarshi chiqdi. Shu bilan birga, yuqori palatadagi barcha respublikachilar ushbu choralarga qarshi ovoz berdi, barcha demokratlar esa ularni yoqladi. Bir nafar respublikachi senator ovoz berishga kelmagan. Endi hujjat vakillar palatasiga yuboriladi, u yerda ma’qullangach, imzolash uchun Baydenga yo‘naltiriladi. Demokratlar qonun loyihasi 14-martgacha qabul qilinishini kutmoqda.
AQSh prezidenti Jo Bayden Senatning ushbu qonun loyihasini ma’qullash qarorini qo‘llab-quvvatladi. Uning aytishicha, hujjat mart oyidanoq amerikaliklarga bir martalik to‘lovlar to‘lashni boshlash imkoniyatini beradi.
Uning aniqlik kiritishicha, AQShda uy xo‘jaliklarining 85 foizdan ortig‘i kishi boshiga 1,4 ming dollardan oladi. Ishlayotgan ota-ona, ikki farzand va 100 ming dollar yillik daromadi bo‘lgan o‘rtacha oila uchun to‘lov miqdori 5,6 ming dollarni tashkil qiladi, dedi u.
Bayden AQSh iqtisodiyotini kuchaytirishga qaratilgan 1,9 trillion dollarlik choralar paketini yanvar o‘rtalarida, hali prezident lavozimiga kirishishidan avvalroq taqdim etgan edi.
Reja quyidagilarni o‘z ichiga oladi:
- pandemiyaga qarshi kurash va vaksinatsiyaga 415 milliard dollar;
- uy xo‘jaliklarga to‘g‘ridagi to‘g‘ri yordam uchun 1 trillion dollar;
- pandemiyada eng ko‘p jabr ko‘rgan kichik biznes tashkilotlarini qo‘llab-quvvatlashga 440 milliard dollar.
Bunga qadar ma’qullangan 600 dollarga qo‘shimcha ravishda soliq to‘lovchilarga 1,4 ming dollardan to‘lash taklif etilmoqda. Shunday qilib, dekabr—yanvar oylaridagi to‘g‘ridan to‘g‘ri to‘lovlar 2 ming dollarni tashkil etadi, pandemiya boshidan buyon — 3,2 ming dollar. Ishsizlik uchun to‘lanadigan qo‘shimcha sug‘urta pullar haftasiga 300 dollardan 400 dollarga oshiriladi.
AQSh Savdo vazirligining iqtisodiy tahlil byurosi ma’lumotlariga ko‘ra, 2020-yilda mamlakat YAIM 3,5 foizga tushib ketgan, bu Ikkinchi jahon urushi davridan buyon kuzatilgan eng yomon ko‘rsatkichdir. 1946-yilda pasayish 11,6 foizga teng bo‘lgan. Federal zaxira tizimi rahbari Jerom Pauell fikricha, AQShda pandemiya oqibatlaridan jabr ko‘rgan mehnat bozorini qayta tiklashga yillab vaqt kerak bo‘lishi mumkin. O‘tgan yilning aprelida mamlakatda ishsizlik darajasi butun pandemiya davridagi maksimumga — 14,8 foizga yetgandi. 2021-yil yanvariga kelib, ko‘rsatkich 6,3 foizgacha tushdi.
Izoh (0)