AQShning The Heritage Foundation tashkiloti tomonidan yuritiladigan iqtisodiy erkinlik indeksining 2021-yilgi hisobotida O‘zbekiston 178 ta o‘rindan 108-o‘rinni egalladi. Bu 2020-yilgi ko‘rsatkichdan 6 pog‘ona yuqori, 2019-yilda esa mamlakat 140-o‘rinda bo‘lgan.
Iqtisodiy erkinlik indeksi to‘rtta asosiy yo‘nalish bo‘yicha 12 ta tarkibiy ko‘rsatkichdan tashkil topgan bo‘lib, mulkchilik huquqi, sud faoliyati samaradorligi, davlatning yaxlitligi, soliq yuki, davlat xarajatlari, fiskal salomatlik, biznes erkinligi, mehnat bozori erkinligi, monetar erkinlik, savdo erkinligi, investitsiyalar erkinligi va moliyaviy erkinlik kabi sohalarda jahon mamlakatlarini 0 dan (eng past) 100 gacha (eng yuqori) bo‘lgan shkalada baholaydi.
Qayd etilishicha, O‘zbekistonda iqtisodiy erkinlik darajasi 2020-yilda 100 balldan 58,3 ballni tashkil etdi. Umumiy ko‘rsatkichi birinchi navbatda sud tizimi samaradorligining oshishi hisobiga 1,1 ballga ko‘tarilgan.
Bu davrda O‘zbekiston iqtisodiyoti asosan erkin bo‘lmaganligicha qolgan. Ammo 2020-yilda hukumat davlat institutlarini isloh qilish, qonun ustuvorligini ta’minlash, sud tizimini isloh qilish, bank va moliya sohalarini mustahkamlashni o‘z ichiga olgan yangi rivojlanish strategiyasini e’lon qildi. Unda, shuningdek davlatning iqtisodiyotga ta’sirini kamaytirish, investitsiyalarni jalb qilish uchun mulk huquqlarini ta’minlash kabi boshqa yaxshilanishlar ham o‘rin olgan. “Agar bu muvaffaqiyatli bo‘lsa, bir kun kelib O‘zbekiston o‘rta darajada erkin bo‘lganlar qatoridan o‘rin olishi mumkin”.
Markaziy Osiyo mamlakatlaridan Qozog‘iston 34-o‘rinni, Qirg‘iziston 78-o‘rinni, Tojikiston 134-o‘rinni, Turkmaniston esa 167-o‘rinni egallagan. Mazkur reytingdagi birinchi uchlikdan Singapur, Yangi Zelandiya, Avstriya o‘rin oldi.
Ma’lumot uchun, The Heritage Foundation iqtisodiy tahlil markazi tomonidan 180 ta davlatning Iqtisodiy erkinlik indeksi 1995-yildan buyon yuritib kelinadi.
Mavzuga doir:
Izoh (0)